اسلام آباد(پاکستان پوائنٹ نیوز30۔اکتوبر۔2018ء) نوائے وقت میڈیا گروپ دا ٹی وی چینل وقت نیوز بند،ٹیکنیکل سٹاف سنے کئی پرچا کار بے روزگار ہو گئے۔ تفصیل مطابق جدوں دی نویں حکومت آئی اے ، اودوں توں ای میڈیا غیر معمولی صورتحال دا ساہمنا کررہیا اے۔ ایس ویلے میڈیا ہاؤسز ڈاڈھیاں اوکڑاں دا شکار نیں۔ چالو حکومت سابق حکومت ولوں دتے گئے اشتہاراں دے پیسے نہیں دے رہی جدکہ حکومت ولوں اشتہار دین دے حوالے نال وی بہت کنجوسی کیتی جا رہی اے جیہدی وجہ توں میڈیا نوں غیر معمولی حالات دا ساہمنا اے۔
ڈالر دی قیمت ودھ رہی اے ،جیہدی وجہ توں نیوز پرنٹ مہنگا ہو رہیا تے اخبار اپنے صفحے گھٹ کر رہے نیں۔ ایس ساری صورتحال دی وجہ توں میڈیا ہاؤسز ڈاڈھیاں اوکڑاں دا شکار سن تے اوہناں ولوں میڈیا ورکرز نوں نوکریوں کڈھن دا سلسلا شروع ہو گیا سی۔ایس موقعے اُتے میڈیا دی حالت زار تے مسائل اک اہم موضوع بن گیا سی۔ کُجھ دن پہلاں کونسل آف پاکستان نیوز پیپرز، ایڈیٹر تے آل پاکستان نیوز پیپرز سوسائٹی دے وفد نے وزیر اعظم عمران خان نال ملاقات کیتی سی۔
ایس ملاقات وچ وزیر اعظم نے میڈیا ہاؤسز دے مسائل دور کرن دی یقین دہانی وی کروائی سی۔ فوری ریلیف دین لئی وزیر اعظم عمران خان نے اخباراں دی چھپائی لئی استعمال ہون والے کاغذ نیوز پرنٹ اُتے عائد 5فیصد ڈیوٹی ختم کر دتی سی۔پر تازہ اطلاع مطابق وقت نیوز چینل بند ہو گیا اے۔ جیہدی تصدیق اینکر عمران خان نے اپنے ٹویٹ وچ کر دتی اے۔
