نواز شریف تے مریم نواز ہمت تے حوصلا ہار گئے

نواز شریف تے مریم نواز بارگین یاں فیر پیسے دے کے جان چھڈوان اُتے راضی ہو گئے:سینئر پرچاکار

نواز شریف تے مریم نواز ہمت تے حوصلا ہار گئے
 نواز شریف تے مریم نواز بارگین یاں فیر پیسے دے کے جان چھڈوان اُتے راضی ہو گئے:سینئر پرچاکار

اسلام آباد(پاکستان پوائنٹ نیوز30۔اکتوبر۔2018ء) اڈیالا جیل توں رہائی مگروں نواز شریف تے مریم نواز دی چُپ اک اہم معمہ بنی ہوئی اے، ایس معاملے اُتے نجی ٹی وی چینل دے پروگرام وچ گل بات کردے ہوئے سینئر پرچا کار غلام حسین نے آکھیا کہ نواز شریف تے مریم نواز ہمت و حوصلا ہار گئے نیں۔ اوہناں نے آکھیا کہ اک طرحاں اوہناں نے پارٹی رہنماواں توں علیحدگی اختیار کر لئی اے۔

پارٹی رہنما اوہناں نال ملاقات کرن لئی منتاں کردے رہندے نیں پر دوویں ای ملاقات لئی ویلا نہیں دیندے۔ اوہناں دا آکھنا سی کہ جے کوئی ڈیل ہوندی اے، تے ساڈے ذمے جِنا پیسہ بندا اے یاں جِنا اسیں دے سکدے آں اوہ قومی خزانے وچ پا دینے آں۔ پلی بارگین کروانی اے تے سانوں ایہدے اُتے وی کوئی اعتراض نہیں اے پر کسے وی طرحاں کوئی وی پاپڑ بیل کے سانوں ایتھوں کڈھوایا جائے۔

چودھری غلام حسین نے آکھیا کہ رانا تنویر پارٹی دے وڈے لیڈر نیں ، اوہ ایس معاملے اُتے کدے چودھری نثار نال ملاقات کر رہے نیں تے کدی خواجا سعد رفیق نال ۔ اوہ آکھ رہے نیں کہ اسیں سارے جا کے میاں صاحب نوں قائل کردے آں کہ جے ایس ویلے تُسیں معافی نامہ لکھ کے باہر چلے گئے تے نقصان ہوئے گا۔ اوہناں نے دسیا کہ نواز شریف تے مریم نواز دا آکھنا اے کہ تہاڈے کول حکومت اے تے حکومت چلان لئی پیسے وی آ گئے نیں ایس لئی سانوں اجازت دیو، ساڈی ذمے جو پیسے نیں سانوں اوہ دے دیو اسیں سیاست توں ریٹائرمنٹ لے لینے آں۔