اسلام آباد(پاکستان پوائنٹ نیوز29۔اکتوبر۔2018ء) سپریم کورٹ نے آئی جی اسلام آباد جان محمد دے تبادلے دا نوٹی فکیشن معطل کر دتااے۔ عدالت نے وفاقی حکومت نوں بدھ تیکر تفصیلی جواب جمع کروان دا حکم وی دتا اے۔ میڈیا رپورٹس مطابق سپریم کورٹ وچ آئی جی اسلام آباد دے تبادلے بارے کیس دی سنوائی ہوئی۔ اٹارنی جنرل نے آئی جی اسلام آباد دے تبادلے بارے سار ا ریکارڈ سپریم کورٹ وچ پیش کیتا۔
عدالت وچ چیف جسٹس سپریم کورٹ سنے تِنوں ججاں نے اسٹیبلشمنٹ ڈویژن تے حکومت اُتے خفگی دا اظہار کیتا۔ عدالت نے پُچھیا کہ کیہ وزیر اعظم دے حکماں اُتے سمری جاری ہوئی سی؟جیہدے اُتے اٹارنی جنرل نے عدالت نوں دسیا کہ آئی جی اسلام آباد نوں وزیر اعظم دے زبانی حکم اُتے ہٹایا گیا سی۔ جسٹس اعجاز الاحسن نے آکھیاکہ اعظم سواتی دی درخاست اُتے آئی جی نوں ہٹایا گیا۔
سیکرٹری اسٹیبلشمنٹ نے دسیا کہ دو تن ہفتیاں توں نواں آئی جی لبھ رہے ساں۔ جیہدے اُتے سپریم کورٹ نے وفاقی حکومت نوں بدھ تیکر تفصیلی جواب جمع کروان دا حکم دے دتا اے۔دوجے پاسے آئی جی اسلام آباد دے تبادلے دے معاملے اُتے آخر اعظم سواتی دا ردعمل ساہمنے آ گیااے۔ میڈیا رپورٹس وچ دسیا گیا اے کہ اعظم سواتی نے درخاست جمع کروائی، جیہدے وچ موقف اختیار کیتا گیا کہ میرے گھر تے باغاں اُتے حملا کیتا گیا۔
میرے گھر اُتے حملا کر کے ملازماں نوں زخمی کیتا گیا۔ ملزماں نے اپنے جنور ساڈے باغاں وچ چھڈے سن۔ منع کرن مگروں ملازماں اُتے کلہاڑیاں تے ڈنڈیاں نال حملا کیتا گیا۔ ملزما ں نے گن مین کولوں کلاشنکوف دے میگزین کھوہ لئے۔ درخاست و چ آکھیا گیا کہ پہلے وی آئی جی اسلام آباد نوں درخاست دتی سی۔اعظم سواتی نے ہور آکھیا کہ کوئی قانون دے خلاف کم نہیں کیتا۔
اک عام شہری دی حیثیت نال آئی جی نال رابطہ کیتا۔ کیہ عام بندے دی حیثیت نال تحفظ دی منگ میرا حق نہیں؟اعظم سواتی نے آکھیا کہ آئی جی اسلام نے میرا 22گھنٹے فون نہیں سُنیا۔ تنگ آ کے معاملا وزیراعظم عمران خان تے سیکرٹری داخلا لے نوٹس وچ لیاندا۔ وفاقی وزیر اعظم سواتی نے سپریم کورٹ وچ پیش ہون دا اعلان وی کیتا۔ اوہناں نے آکھیا کہ سپریم کورٹ وچ پیش ہو کے اپنا موقف پیش کراں گا۔
یاد رہوے کہ پچھلے دیہاڑے آئی جی اسلام آباد دے تبادلے دی خبر ساہمنے آئی سی۔ جیہدا چیف جسٹس آف پاکستان میاں ثاقب نثار نے نوٹس لیندے ہوئے آکھیا سی کہ پولیس وچ کسے طور اُتے سیاسی مداخلت برداشت نہیں کراں گے۔ اوہناں دا آکھنا سی کہ قانون دی حکمرانی قائم ہوئے گی۔ اسیں اداریاں نوں کمزور نہیں ہون دیواں گے۔ سُنیا اے کہ کسے وزیر دے پُتر دا معاملا اے۔ جیہدے مگروں چیف جسٹس نے سیکرٹری داخلا تے اٹارنی جنرل نوں سپریم کورٹ سدیا سی۔
