اسلام آباد(پاکستان پوائنٹ نیوز24۔اکتوبر۔2018ء) جسٹس عمر عطابندیال دی طبیعت خراب، پمز ہسپتال منتقل۔تفصیل مطابق سپریم کورٹ دے جج جسٹس عمر عطا بندیال دی طبیعت خراب ہون اُتے اوہناں نوں ہسپتال منتقل کیتا گیا، جتھے گیسٹر الوجسٹ ڈاکٹر مشہود نے اوہناں دا ڈاکٹری معائنہ کیتا۔ ڈاکٹری معائنے مگروں ایہ گل ساہمنے آئی کہ جسٹس عمر عطا بندیال نوں فوڈ پوائزننگ ہوئی، جیہدی وجہ توں اوہناں دی طبیعت خراب ہوئی۔
یاد رہوے کہ جسٹس عمر عطا بندیال پچھلے دیہاڑے اوس ویلے خبراں دیاں سُرخیاں بنے جدوں خبر آئی کہ شریف خاندان دی رہائی خلاف نیب دیاں اپیلاں سنن والا بنچ ٹُٹ گیا اے۔ سپریم کورٹ دے جسٹس عمر عطا بندیال نے نواز شریف تے مریم نواز خلاف اپیلاں سُنن توں معذرت کر لی۔ میڈیا رپورٹس وچ دسیا گیا سی کہ جسٹس عمر عطابندیال نے نیب دیاں اپیلاں اُتے سنوائی توں معذرت کر لی اے۔ ہن بنچ وچ جسٹس مظہر عالم نوں شامل کیتا گیا اے۔ چیف جسٹس سپریم کورٹ دی سربراہی وچ بنن والے بنچ وچ جسٹس مشیر عالم تے جسٹس مظہر عالم شامل ہون گے۔
