گوجرانوالا(پاکستان پوائنٹ نیوز20۔اکتوبر۔2018ء) ملک وچ ٹریفک دا نظام بہتر کرن تے ٹریفک قوانین نوں لاگو کروان لئی کئی اقدامات کیتے جا رہے نیں۔ تھاں تھاں ٹریفک وارڈنز نوں تعینات کیتا گیا اے جو سڑکاں اُتے ٹریفک دی آوا جاوی نوں بہتر بنان تے قانون دی خلاف ورزی اُتے شہریاں نوں جرمانے وی کردے نیں پر کُجھ دن پہلاں گوجرانوالا وچ اک جعلی ٹریفک وارڈن نوں گرفتار کیتا گیا ، جیہنے ٹریفک وارڈن دی وردی نوں استعمال کردے ہوئے شہریاں نوں دس سال تیکر لُٹیا۔
جعلسازدی شناخت شہزاد انور دے ناں توں ہوئی اے۔ اصلی ٹریفک پولیس ہتھے چڑھن والا جعلساز شہزاد انوار جعلی ٹریفک وارڈن بس سٹاپ نیڑے شہریاں دا چالان کر رہیا سی کہ ایس دوران اصلی ٹریفک وارڈن موقعے اُتے اپڑ گیا۔ اپنی تھاں اوہنوں ویکھ کے اصلی ٹریفک وارڈن نے ملزم شہزاد کولوں پُچھیا تے اوہ گھبرا گیا، شہزاد دی گھبراہٹ ویکھ کے اصلی ٹریفک وارڈن نوں اوہدے اُتے شک ہویا ، تے اوہنوں گرفتار کر لیا گیا ۔
سٹی ٹریفک پولیس دا آکھنا اے کہ گوجرانوالا دا شہری شہزاد ٹریفک وارڈن دی وردی پاکے شہریاں دے چالان کر کے جعلی رسیداں دیندا سی۔ جعلی ٹریفک وارڈن شہزاد انور کولوں جعلی سروس کارڈ، چالان دی رقم، پستول تے یونیفارم بیچز برآمد ہوئے نیں۔ تفتیش دوران ملزم نے دسیا کہ میں ایہ کم پچھلے دس ورھیاں توں کر رہیا واں۔پولیس مطابق ملزم خلاف مقدمہ درج کرکے معاملے دی ہور تفتیش شروع کر دتی گئی اے۔
