اسلام آباد(پاکستان پوائنٹ نیوز20۔اکتوبر۔2018ء) نجی ٹی وی چینل دے پروگرام وچ گل بات کردے ہوئے سینئر پرچا کار چودھری غلام حسین نے آکھیا کہ خواجا سعد رفیق دی دوجی بیوی شفق حرا نے پی ٹی وی دے دفتر وچ مٹھیائی ونڈی۔ چودھری غلام حسین نے دسیا کہ شفق حرا 14اکتوبر دے الیکشن دی رات مٹھیائی دے دو وڈے وڈے ٹوکرے لے کے آئیاں تے اوہناں نے ای پی ٹی وی دے دفتر وچ مٹھیائی ونڈی تے آکھیا کہ میرے خاوند این اے 131توں کامیاب ہو گئے نیں، ایسے خشی وچ مٹھیائی ونڈ رہی آں تے سویرے 7وجے تیکر مسلم لیگ (ن) دے سارے پالتو لوک اوتھے بِہ کے پراپیگنڈہ کردے رہے جدکہ فواد چودھری تے ہور اوتھے بِہ کے اوہناں دا مُونہ تَکدے رہے۔
ایس توں وکھ چودھری غلام حسین نے آکھیا کہ پوری قوم نوں اک بریکنگ نیوز دے رہیا واں کہ قیوم جو لاہور ہائی کورٹ دے جج نیں، اوہناں دی تے شہباز شریف دی،ایس توں وکھ سیف الرحمان وغیر ہ دی جو آڈیو ٹیپاں کُجھ چِر پہلاں ساہمنے آئیاں سن تے جیہدی بنیاد اُتے وڈے وڈے فیصلے ہوئے سن ، ایس توں وڈی سطح دی آڈیو ریکارڈنگ لیک ہوئی اے، چودھری غلام حسین نے آکھیا کہ اسی لیول دے ملک وچ جو وڈے وڈے فیصلے ہوئے نیں اوہدے بارے اک آڈیو ٹیپ دی پکی خبر سانوں ملی اے۔اوہناں نے آکھیا کہ ایہ لیک ہوئی آڈیو ٹیپ کسے ویلے وی آن ائر آ سکدی اے ۔اوہناں دا آکھنا سی کہ ایس آڈیو ٹیپ نال اک بھونچال آ جائے گا۔
