شہباز شریف دی گرفتاری پچھے رانا مشہود دا بیان اے:نیبل گبول

کرپشن اُتے لوک تے گرفتار ہوندے نیں پر ریکوری نہیں ہوندی:گل بات

شہباز شریف دی گرفتاری پچھے رانا مشہود دا بیان اے:نیبل گبول
 کرپشن اُتے لوک تے گرفتار ہوندے نیں پر ریکوری نہیں ہوندی:گل بات

کراچی(پاکستان پوائنٹ نیوز18۔اکتوبر۔2018ء) پاکستان پیپلز پارٹی دے رہنما نبیل گبول نے آکھیا اے کہ شہباز شریف نوں جیل گھلن پچھے رانا مشہود دا بیان اے۔ گل بات کردے ہوئے نبیل گبول نے آکھیا کہ شہباز شریف دے وعدہ معاف گواہ بنن دیاں پارلیما نی تحقیقات ہونیاں چاہیدیاں۔ اسیں ایہ نہیں آکھیا کہ شہباز شریف اُتے ہتھ نہ پاؤ، قانون مطابق کارروائی کرو۔

اوہناں نے آکھیا کہ پہلے گرفتار کردے نیں تے فیر تحقیقات ،جو غلط اے۔ نبیل گبول دا آکھنا سی کہ کرپشن اُتے لوک تے گرفتار ہوندے نیں پر ریکوری نہیں ہوندی۔ پاکستان وچ کرپشن ہوئی اے تے ایہدے وچ کوئی شک نہیں اے۔ اوہناں نے آکھیا کہ چیئرمین نیب نال ملاقاتاں نہیں ہونیاں چاہیدیاں۔ احتساب تے گرفتاریاں بغیر کسے فرق دے ہونیاں چاہیدیاں۔ پی ٹی آئی دے لوکاں نوں کیوں نہیں پھڑیا جا رہیا ۔

نبیل گبول نے آکھیا کہ اج تاریخ دی مضبوط ترین اپوزیشن اے ۔ پاکستان وچ ایس ویلے بہت سارے بحران نیں۔ اپوزیشن نوں اک ہونا چاہیدا۔ اپوزیشن جدوں وی چاہے حکومت ڈیگ سکدی اے۔اک سوال دے جواب وچ اوہناں نے آکھیا کہ عمران خان نوں وزیر اعظم بنان والے 4سیٹاں والے اوہناں توں ناراض نیں۔ اوہناں نے انکشاف کیتا کہ وزیر اعظم دے اتحادی اوہناں نال رُسے تے ساڈے نال ملے ہوئے نیں۔