اسلام آباد(پاکستان پوائنٹ نیوز17۔اکتوبر۔2018ء) نجی ٹی وی چینل نال گل بات کردے ہوئے وفاقی وزیر خزانہ اسد عمر نے آکھیا کہ ملکی معیشت چھیتی ای مضبوط ہون والی اے۔ اوہناں نے آکھیا کہ انشااللہ پاکستان تیزی نال ترقی وی کرے گا، خشحالی وی آئے گی، روزگار دے موقعے وی ملن گے تے انشااللہ پاکستانی تاریخ دا ایہ آخری آئی ایم ایف پروگرام ہوئے گا۔ اوہناں نے حکومت دے 50لکھ گھراں دے منصوبے بارے گل بات کردے ہوئے آکھیا کہ ساڈی حکومت دے معیشت بارے جِنے وی نشانے(اہداف) نیں، اوہدے وچوں سبھ توں وڈا چیلنج ایہی اے کہ ساڈی حکومت نے غریب لوکائی لئی 50لکھ گھر بنانے نیں۔
پر ایہنوں کرنا کس طریقے نال اے؟ایس منصوبے وچ بجٹ دی سپورٹ دی ضرورت ضرور ہوئے گی پر ایس منصوبے دا دارومدار بجٹ اُتے نہیں اے۔ جے تُسیں بنکنگ دا نظام ویکھو تے تہانوں پتا ہوئے گا کہ بنک کاروبار، انڈسٹری، صنعت تے زراعت نوں پیسہ دیندے سن، پچھلے دس سالاں توں جدوں توں ایہ حکومت دے نظام وچ کمزوری آئی تے ساڈے بجٹ دے کسارے(خسارے) اینے ودھ گئے نیں کہ سارا پیسہ حکومت لیجاندی رہی۔ اوہناں دا آکھنا سی کہ ایس ویلے جو بنکنگ سسٹم اے اوہ بجائے کہ کاروبار نوں فنانس کرے اوہ حکومت دے خرچے برداشت کر رہیا اے۔ ایس لئی اجے جو اسیں مشکل فیصلے کر رہے آں اوہ ایس لئی کر رہے آں تاں جے اسیں اپنے بجٹ دے کسارے(خسارے) وچ تے بیرونی قرضیاں وچ کمی لیائیے ۔
