لاہور(پاکستان پوائنٹ نیوز16۔اکتوبر۔2018ء) مسلم لیگ (ن) دے مرکزی رہنما و اپوزیشن لیڈر پنجاب اسمبلی حمزہ شہباز شریف نے آکھیا کہ مریم نواز جیل جا سکدیاں نیں تے علیمہ خان دا وی حساب دیو، نیب دے پچھے نیازی دا ہتھ اے، ضمنی الیکشن وچ شہباز شریف دی گرفتاری اُتے لینے دے دینے پے گئے۔ اوہناں نے اج پارلیمانی اجلاس مگروں میڈیا نال گل بات کردے ہوئے آکھیا کہ ضمنی الیکشن دے نتیجے مسلم لیگ (ن) دے حق وچ آئے نیں۔
شہباز شریف دی گرفتاری دی صورت وچ تہاڈا بغض ساہمنے آ گیا۔ پر لوکائی سُن لوے، نیب پچھے نیازی دا ہتھ اے۔ نیب پچھے نیازی اے ہور کُجھ نہیں اے۔ شہباز شریف دی گرفتاری اُتے نیازی نوں لینے دے دینے پے گئے۔ اوہناں دا آکھنا سی کہ شہباز شریف نوں دھر لوو، ضمنی الیکشن جِت جاواں گے۔ عمران خان نوں جھوٹھ پچھے لُکن نہیں دیواں گے۔ تحریک انصاف دی حکومت دا مینڈیٹ جعلی اے۔ اوہناں نے آکھیا کہ مریم جیل جا سکدیاں نیں تے علیمہ خان وی آف شور کمپنیاں دا حساب دین۔ تحریک انصاف نے خیبرپختونخوا وچ احتساب دا ادارہ بند کر دتا سی۔اوہناں نے آکھیا کہ ایہ شیشے دے گھر وچ بیٹھے نیں۔ اسمبلی وچ احتجاج جاری رکھاں گے۔ اوہناں نوں کیہ ڈر سی کہ ساڈے آکھن اُتے اجلاس نہیں سدیا؟
