زینب قتل کیس دے مجرم دی گھر والیاں نال ملاقات، معافیاں منگدا رہیا

زینب قتل کیس دے مجرم دی گھر والیاں نال ملاقات، معافیاں منگدا رہیا

لاہور(پاکستان پوائنٹ نیوز16۔اکتوبر۔2018ء) زینب قتل کیس دے مجرم عمران علی نوں کل سویرے پھانسی دے دتی جائے گی۔ تفصیل مطابق اج گھر والیاں سنے 40توں ودھ رشتے داراں نے مجرم علی عمران نال ملاقات کیتی۔ ملاقات دوران مجرم عمران علی اپنے ماں پیو کولوں معافی منگدا رہیا۔ مجرم عمران علی نے اپنے گھر والیاں نوں ہدایت کیتی کہ زینب دے ماں پیو تیکر وی میری معافی دی اپیل اپڑا دینا تے اوہناں اگے بینتی کرنا کہ اوہ مینوں معاف کر دین۔

یاد رہوے کہ پچھلے دیہاڑے خبر آئی سی کہ مجرم عمران علی نوں پھانسی دین توں پہلاں اوہدی وارثاں نال ملاقات کروائی جائے گی۔ ملاقات12وجے ہوئے گی۔ مجرم نال ملاقات کرن والیاں وچ بھین، بھرا تے ماں پیو شامل ہون گے۔ ایس حوالے نال جیل انتظامیہ نے ملزم دی ماں سلمی بی بی نوں خط لکھیا سی۔ وارث 50توں گھٹ رشتے داراں نوں آخری ملاقات لئی لیا سکدے سن۔ خط وچ وارثاں نوں ہدایت کیتی گئی کہ سویرے ساڈھے پنج وجے ایمبولینس، سوٹ تے چادر لے کے میت لین آن تے مجرم دی میت میڈیکل افسر دی رپورٹ مگروں ای وارثاں دے حوالے کیتی جائے گی۔

پھانسی دے موقعے اُتے ڈیوٹی مجسٹریٹ مجرم عمران علی دی آخری خاہش پُچھے گا تے ایہدا جو طریقہ کار اے اوہدے مطابق میڈیکل چیک اپ وی کروایا جائے گا ۔ جیل وسیلیاں دا آکھنا سی کہ مجرم دے چہرے اُتے موت دا خوف وکھالی دیندا اے۔ مجرم نوں کئی وار پچھتاوے دے اُتے طور روندے ویکھیا گیا۔ مجرم عمران علی نوں سینٹرل جیل وچ عام قیدیاں وانگ روٹی پانی دتا جاندا اے تے اوہدی سخت مانیٹرنگ وی کیتی جاندی اے۔ مجرم نے ایس گل دا وی اظہار کیتا اے کہ اوہ آخری خاہش وچ زینب دے ماں پیو کولوں معافی منگن دی درخاست کرنا چاہندا اے۔