لاہور(پاکستان پوائنٹ نیوز16۔اکتوبر۔2018ء) پاک فوج دے ترجمان میجر جنرل آصف غفور نے آکھیا اے کہ پاک فوج افغان سرحد اُتے دہشت گرداں نال نبڑن دی صلاحیت رکھدی اے۔ ڈائریکٹر جنرل آئی ایس پی آر جنرل آصف غفور نے برطانیہ وچ وارک شائر یونیورسٹی وچ خطاب کردے ہوئے آکھیا کہ امن مشن وچ فرض نبھان دوران 250جوان شہید ہوئے نیں۔ دہشت گردی دی جنگ وچ 80ہزار پاکستانیاں نے قربانیاں دتیاں نیں۔
دنیا وچ امن دی خاطر سبھ توں وڈی قربانی پاک فوج نے دتی اے۔ دہشت گردی دے خاتمے لئی دنیا نوں پاکستان دا شکریہ ادا کرنا چاہیدا۔ اوہناں نے واضح کیتا کہ القاعدہ نوں پاکستان دی مدد دے بغیر کدی وی شکست نہیں ہو سکدی سی۔ اوہناں نے آکھیا کہ پاک فوج افغان سرحد اُتے دہشت گرداں نال نبڑن دی صلاحیت رکھدی اے۔ افغانستان دی صورتحال دی وجہ توں مغربی سرحد اُتے فوج الرٹ اے۔
مغربی ملکاں نے افغانستان اُتے 1.3ٹریلین ڈالر خرچ کیتے۔ 1.3ٹریلین مگروں وی افغانستان دا 70فیصد رقبہ قبضے وچ اے۔ جدکہ ایہدے مقابلے وچ اسیں صرف اک فیصد خرچ کیتا اے۔ افغان مہاجرین دی وڈی گنتی پاکستان وچ موجود اے۔ افغانی مہاجرین دی پاکستان وچ کیتے وی حرکت اُتے پابندی نہیں اے۔ پاکستان تے افغانستان دا امن اک دوجے نال جُڑیا اے۔ اوہناں نے آکھیا کہ پاکستان دے بغیر خطے تے دنیا وچ امن قائم نہیں ہو سکدا۔ سکیورٹی لئی جو کم مناسب ہوئے اوہ کراں گے۔ پاکستان دی خاہش اے کہ امریکا افغانستان وچ مکمل امن دے قیام تیکر رہوے۔
