اسلام آباد(پاکستان پوائنٹ نیوز16۔اکتوبر۔2018ء) سپریم کورٹ آف پاکستان نے پوسٹ پیڈ نمبرز اُتے سروس چارجز ختم کر دتے۔ تفصیل مطابق سپریم کورٹ وچ موبائل کمپنیاں ولوں وادھو ٹیکس لین دے کیس دی سنوائی ہوئی۔ چیف جسٹس ثاقب نثار دی سربراہی وچ تن رکنی بنچ نے کیس دی سنوائی کیتی۔ سپریم کورٹ نے پوسٹ پیڈ نمبرز اُتے وی وادھو سروس ٹیکس ختم کر دتا۔ سنوائی دوران اے جی پنجاب نے آکھیا کہ سروس چارجز ختم کرن نال پنجاب نوں ہر مہینے 2ارب رُپئے دا نقصان ہویا اے۔
چیف جسٹس نے آکھیا کہ جے تُسیں غلط ٹیکس لے رہے سی تے ایہ نقصان نہیں اے۔ اک بندہ 100رُپئے دا کارڈ لوڈ کردا اے تے صوبے نوں پیسے کیوں دیوے۔ معاملے وچ کیہڑی سروس صوبہ دے رہیا اے جو چارجز ملن۔ تندور توں روٹی لے کے آن والے نوں روٹی کھان اُتے وی ٹیکس دینا پئے گا؟ایس معاملے اُتے وفاق، بلوچستان تے پنجاب نے عدالت کولوں ہور مہلت منگ لی۔ایڈووکیٹ جنرل سندھ نے آکھیا کہ اک مہینے توں اک ارب رُپئے دا نقصان ہو رہیا اے۔
چیف جسٹس نے آکھیا کہ تُسیں جو کک بیک لیندے او اوہ ختم کر دیو، اک ارب رُپئے نال فرق نہیں پئے گا۔ ایہ لانچاں راہیں پیسے گھلنا بند کر دیو۔ ایڈووکیٹ جنرل سندھ نے آکھیا کہ میں مقدمے وچ دلائل دینا چاہنا واں۔ جیہدے اُتے عدالت نے آکھیا کہ تہاڈے دلائل بعدوں سُناں گے،جیہدے مگروں کیس دی ہور سنوائی نوں ان مِتھے چِر لئی ملتوی کر دتا گیا۔
