اسلام آباد(پاکستان پوائنٹ نیوز15۔اکتوبر۔2018ء) ضمنی الیکشن وچ پی ٹی آئی دی ہار توں تحریک انصاف دے چیئرمین عمران خان وی پریشان ہوگئے۔ میڈیا رپورٹس مطابق عمران خان ضمنی الیکشن وچ پارٹی دا گراف ڈِگن اُتے پریشان نیں۔ عمران خان نے پارٹی رہنماواں نال ملاقات دوران جِتیاں ہوئیاں سیٹاں ہارن اُتے تشویش دا اظہار کیتا۔ عمران خان نے پارٹی رہنماواں نوں ہارن دی وجہ دا جائزہ لین دی ہدایت کیتی اے۔
دوجے پاسے عمران خان نے سینئر رہنماواں دا اجلاس وی سد لیا اے۔ اجلاس وچ جِتیاں ہوئیاں سیٹاں ہارن دی وجہ دا جائزہ لیا جائے گا۔ ایس توں وکھ اج میڈیا رپورٹس مطابق وزیر اعظم عمران خان تے وفاقی وزیر ریلوے شیخ رشید وچکار ملاقات ہوئی اے۔ ملاقات دوران ضمنی الیکشن بارے وچار وٹاندرا کیتا گیا۔ وزیر اعظم عمران خان نے آکھیا کہ قومی اسمبلی وچ گھٹ سیٹاں ملن دیاں تحقیقات ہونیاں چاہیدیاں جدکہ شیخ رشید نے این اے 60وچ گھٹ مارجن نال جِت دی وجہ بارے عمران خان نوں دسیا۔
عمران خان نے شیخ راشد شفیق دی جت اُتے شیخ رشید نوں مبارکباد دتی۔ شیخ رشید نے وی عمران خان نوں یقین دہانی کروائی کہ شیخ راشد تحریک انصاف وچ بھرپور کردار نبھان گے۔یاد رہوے کہ این اے 60راولپنڈی دے حلقے توں شیخ رشید دے بھتیجے شیخ راشد شفیق نے تحریک انصاف دی ٹکٹ اُتے الیکشن وچ حصہ لیندے ہوئے جِت حاصل کیتی۔
