زینب قتل کیس دے مجرم دی ممکنہ آخری خاہش

مجرم عمران علی زینب دے ماں پیو کولوں معافی منگنا چاہندا اے

زینب قتل کیس دے مجرم دی ممکنہ آخری خاہش
مجرم عمران علی زینب دے ماں پیو کولوں معافی منگنا چاہندا اے

لاہور(پاکستان پوائنٹ نیوز15۔اکتوبر۔2018ء) زینب قتل کیس وچ سزا یافتہ مجرم عمران علی دے ڈیتھ وارنٹ پچھلے دیہاڑے جاری کیتے گئے ،جیہدے تحت مجرم عمران علی نوں 17اکتوبر نوں پھانسی دتی جائے گی۔ پھانسی دین توں پہلاں مجرم عمران علی دی 16اکتوبر نوں اوہدے وارثاں نال ملاقات کروائی جائے گی۔ ملاقات کل 12وجے ہوئے گی۔ مجرم نال ملاقات کرن والیاں وچ بھین، بھرا تے ماں پیو شامل ہون گے۔

ایس حوالے نال جیل انتظامیہ نے ملزم دی ماں سلمی بی بی نوں خط لکھ دتا اے۔ وارث 50توں گھٹ رشتے داراں نوں آخری ملاقات لئی لیا سکدے نیں۔ خط وچ وارثاں نوں ہدایت کیتی گئی کہ سویرے ساڈھے پنج وجے ایمبولینس، سوٹ تے چادر لے کے میت لین آن تے مجرم دی میت میڈیکل افسر دی رپورٹ مگروں ای وارثاں دے حوالے کیتی جائے گی۔ پھانسی دے موقعے اُتے ڈیوٹی مجسٹریٹ مجرم عمران علی دی آخری خاہش پُچھے گا تے ایہدا جو طریقہ کار اے اوہدے مطابق میڈیکل چیک اپ وی کروایا جائے گا ۔

جیل وسیلیاں دا آکھنا اے کہ مجرم دے چہرے اُتے موت دا خوف وکھالی دیندا اے۔ مجرم نوں کئی وار پچھتاوے دے اُتے طور روندے ویکھیا گیا۔ مجرم عمران علی نوں سینٹرل جیل وچ عام قیدیاں وانگ روٹی پانی دتا جاندا اے تے اوہدی سخت مانیٹرنگ وی کیتی جاندی اے۔ مجرم نے ایس گل دا وی اظہار کیتا اے کہ اوہ آخری خاہش وچ زینب دے ماں پیو کولوں معافی منگن دی درخاست کرنا چاہندا اے۔