اسلام آباد(پاکستان پوائنٹ نیوز11۔اکتوبر۔2018ء) سعودی عرب نے تیل دی بھال(دریافت) وچ پاکستان دی مدد کرن دی آفر کیتی اے۔ تفصیل مطابق پاکستان تے سعودی عرب وچکار بھراواں وانگ تعلقات نیں۔ سعودی عرب نے ہر اوکھے ویلے وچ پاکستان دا ساتھ دتا اے۔ پر ہن سعودی عرب نے پاکستان نوں تیل دی بھال وچ مدد دین دی آفر کیتی اے۔ ایس گل دا ذکر وزیراعظم عمران خان تے وزیر پٹرولیم غلام سرور خان دی ملاقات دوران وی ہویا۔
غلام سرور خان نے وزیراعظم نال ملاقات دوران سعودی عرب سنے ہور ملکاں نال ہون والی گل بات بارے وزیر اعظم نوں دسیا۔ ایس موقعے تے وزیر اعظم دا آکھنا سی کہ پاکستان وچ پٹرولیم دے شعبے وچ سرمایہ کاری دے وڈے موقعے موجود نیں۔ سعودی عرب نوں ڈرلنگ دے شعبے وچ سرمایہ کاری دی آفر کیتی اے۔ تیل دی بھال وچ سعودی عرب نے دلچسپی دا اظہار کیتا اے۔
