اسلام آباد(پاکستان پوائنٹ نیوز11۔اکتوبر۔2018ء) سینیٹر عثمان کاکڑ وی جعلی اکاؤنٹ دی زد وچ آ گئے۔ سینیٹر عثمان کاکڑ نے دعوا کیتا اے کہ میرے ناں اُتے جعلی بنک اکاؤنٹ موجود اے۔ تفصیل مطابق اجکل پاکستان وچ جعلی اکاؤنٹس دیاں خبراں عام نیں۔ ایس سلسلے وچ ایف آئی اے وی تحقیقات کر رہی اے۔کُجھ دن پہلاں حیدر آباد توں تعلق رکھن والا ڈرائیور پردیپ کمار اپنے اکاؤنٹ وچ چار کروڑ توں ودھ پیسے ویکھ کے حیران رہ گیا۔
ڈرائیور دا آکھنا سی کہ میں اپنے اکاؤنٹ وچوں پیسے کڈھوان اے ٹی ایم گیا تے پیسے کڈھوان مگروں میں سلپ ویکھ کے حیران رہ گیا کیونکہ ستمبر وچ میرے اکاؤنٹ اندر صرف 18ہزار رُپئے سن پر سلپ اُتے ویکھیا کہ میرے اکاؤنٹ وچ 4کروڑ99لکھ54ہزار موجود نیں۔ایس حوالے نال سینیٹ وچ کمیٹی بنائی گئی۔پر کمیٹی دے سربراہ عثمان کاکڑ دا آکھنا سی کہ اوہناں دے ناں اُتے وی جعلی اکاؤنٹ موجود اے۔ عثمان کاکڑنے دعوا کیتا اے کہ اوہناں دے ناں اُتے جعلی اکاؤنٹ چل رہیا اے۔ کمیٹی دے اجلاس دوران سینیٹر عثمان کاکڑ نے آکھیا کہ میں ایس حوالے نال ایف آئی اے دے ڈی جی نوں درخاست دے دتی اے۔
