اسلام آباد(پاکستان پوائنٹ نیوز11۔اکتوبر۔2018ء) چین نے پاکستان نوں کرپشن دے خاتمے لئی مدد دین دی حامی بھر لئی، چیئرمین نیب مطابق کرپشن وچ پاکستان دا نمبر 175توں گھٹ ہو کے 116اُتے آ گیا، پاکستان تے چین نے کرپشن دے خاتمے لئی یادداشت اُتے دستخط کیتے۔ تفصیل مطابق ملک وچوں کرپشن دے خاتمے لئی چین نال رلکے چلن دے حوالے نال پاکستان تے چین وچکار یادداشت اُتے دستخط کر دتے گئے نیں۔
چین نے پاکستان نوں کرپشن دے خاتمے لئی مدد دین دی حامی بھر ی اے۔ ایس حوالے نال چیئرمین نیب جاوید اقبال نے دسیا اے کہ پاکستان تے چین نے کرپشن دے خاتمے لئی یادداشت اُتے دستخط کردتے نیں۔ پاکستان تے چین سی پیک منصوبے دی شفافیت لئی رلکے کم کرن گے۔ چیئرمین نیب جاوید اقبال دا ہور آکھنا سی کہ کرپشن وچ پاکستان دا نمبر 175توں گھٹ ہو کے 116اُتے آ گیا اے۔ نیب نے کرپشن نوں جڑوں پٹن دی نیت کیتی اے۔ نیب پاکستان نوں کرپشن توں پاک کرن لئی کم کرے گا۔ چیئرمین جسٹس (ر) جاوید اقبال نے ہور آکھیا کہ نیب نے جدید ترین ڈیجیٹل فرانزک سائنس لیبارٹری تیار کیتی اے۔ نیب ولوں تیار کیتی گئی لیبارٹری وچ ڈیجیٹل فرانزک تے فنگر پرنٹ دے جائزہ دیاں سہولتاں موجود نیں۔
