لاہور(پاکستان پوائنٹ نیوز08۔اکتوبر۔2018ء) ہیلمٹ دی پابندی دے مثبت اثرات ساہمنے آنا شروع ہو گئے۔ تفصیل مطابق سرکاری ڈاکٹر سلمان کاظمی دا آکھنا اے کہ جدوں توں لاہور ہائی کورٹ ولوں ٹریفک حادثیاں خلاف اک مہم چلائی گئی اے تے موٹر سائیکل سواراں نوں ہیلمٹ پان دا آکھیا گیا اے، اودوں توں سرکاری ہسپتالاں وچ جِنے ہیڈ انجری دے روگی آؤندے سن اوہناں دی گنتی وچ کمی ہوئی اے تے ہیلمٹ دی پابندی مگروں سِر وچ سَٹ لگن نال آن والے لوکاں وچ تقریبن 30فیصد کمی آئی اے۔
جیہدی وجہ توں ایمرجنسی تے ڈاکٹراں اُتے وی لوڈ گھٹ ہویا اے۔ اوہناں دا آکھنا سی کہ جدوں حادثے دی وجہ توں روگیاں نوں ہسپتال لیاندا جاندا سی تے اوہناں وچوں کئی روگیاں نوں بچانا مشکل ہو جاندا سی۔ ڈاکٹر سلمان کاظمی دا آکھنا سی کہ میں لاہور ہائی کورٹ دے ایس اقدام دی تعریف کرنا واں۔یاد رہوے کہ لاہور ہائی کورٹ نے ہیلمٹ تے سائیڈ شیشے نہ لان والے پولیس اہلکاراں تے وارڈناں دے چالان کرن تے محکمانہ کارروائی دا حکم دیندے ہوئے ریمارکس دتے سن کہ قانون توڑن والے کُجھ پولیس اہلکاراں نوں گھر گھل کے دوجیاں لئی مثال بناؤ۔
