لاہور(پاکستان پوائنٹ نیوز04۔اکتوبر۔2018ء) حکومت نے بجلی تے گیس مگروں دوائیاں مہنگیاں کرن دی تیار شروع کردتی اے۔ میڈیا رپورٹس وچ دسیا گیا اے کہ ڈرگ ریگولیٹری اتھارٹی نے 250دوائیاں دیاں قیمتاں وچ 10توں 30فیصد وادھے دی منظوری دے دتی۔ ڈرگ ریگولیٹری اتھارٹی دا ہور 200دوائیاں دی قیمت وچ وادھے دا فیصلا کرن لئی آؤندے ہفتے اجلاس ہوئے گا۔ ڈرگ ریگولیٹری اتھارٹی ولوں جیہڑیاں دوائیاں دیاں قیمتاں وچ وادھے دی منظوری دتی گئی اے ، اوہناں وچ کینسر، ڈائلسز، گردیاں دے علاج، اینٹی بائیوٹک، ساہ، الرجی تے ملٹی وٹائمن دیاں دوائیاں شامل نیں۔
ڈرگ ریگولیٹری اتھارٹی ولوں سپریم کورٹ دے حُکماں اُتے ہارڈ شپ کیس دے تحت450توں ودھ دوائیاں دیاں قیمتاں دا جائزہ لین مگروں پہلے مرحلے وچ 250دوائیاں دیاں قیمتاں وچ 10توں30فیصد وادھے دی منظوری دتی جائے گی۔ دوائیاں دی قیمت وچ ذکر کیتے گئے وادھے ڈرگ پرائسنگ پالیسی دے تحت سالہوار(سالانہ) وادھے توں وکھ نیں۔ ڈرگ پرائس پالیسی مطابق فارما سیوٹیکل کمپنیاں دوائیاں دیاں قیمتاں وچ سالہوار فراط زر شرح مطابق 50توں 70فیصد تیکر وادھا کر سکدی اے۔
سپریم کورٹ نے دوائیاں تے کارڈیک سٹنٹ دے مقدمے وچ ڈرگ ریگولیٹری اتھارٹی نوں 12ہفتیاں وچ 450دوائیاں دیاں قیمتاں دا دوبارہ جائزہ لین دا حکم دتا سی۔ڈرگ ریگولیٹری اتھارٹی450توں ودھ دوائیاں دی قیمت وچ وادھے دا فیصلا کر کے منظوری لئی وزارت قومی صحت و وفاقی کابینہ نوں گھلے گی۔جیہدی منظوری مگروں دوائیاں دیاں قیمتاں وچ وادھے دا حکم جاری کیتا جائے گا۔
