لاہور(پاکستان پوائنٹ نیوز29۔ستمبر۔2018ء) چیف جسٹس آف پاکستان جسٹس میاں ثاقب نثار نے پنجاب بھر دیاں پرائیویٹ یونیورسٹیاں بارے آپ نوٹس لیندے ہوئے ایڈووکیٹ جنرل پنجاب نوں یونیورسٹیاں تے ملحقہ کالجاں دیاں تفصیلاں پیش کرن دا حکم دے دتا۔ ہفتے د ے دیہاڑے چیف جسٹس ثاقب نثار دی سربراہی وچ بنچ نے سپریم کورٹ لاہور رجسٹری وچ یونیورسٹی آف ساؤتھ ایشیا دے ملحقہ کالج دے پڑھیار نوں ڈگری نہ ملن دے کیس دی سنوائی دوران آپ نوٹس لیا۔
سنوائی دوران ہائر ایجوکیشن کمیشن ولوں آکھیا گیا کہ یونیورسٹی آف ساؤتھ ایشیا نے بغیر اجازت کالج نال الحاق کیتا۔ ہائر ایجوکیشن کمیشن دا ہور آکھنا سی کہ صرف ڈگری نہیں، ادارے وچ اُستاداں دا ہونا وی ضروری اے۔ ایس موقعے تے چیف جسٹس نے ریمارکس دتے کہ ایہ لوکاں نال فراڈ کر رہے نیں ۔تعلیم دا بیڑا غرق کر دتا گیا اے۔ چیف جسٹس نے آکھیا کہ دسیا جائے ایہ یونیورسٹیاں کدوں توں کم کر رہیاں نیں تے فیس کیہ لیندیاں نیں۔
ایہدے نال چیف جسٹس ثاقب نثار نے آکھیا کہ قانون دے خلاف کیمپس کھولن اُتے فوجداری مقدمے درج کیتے جان گے میں ویکھاں گا کہ کون ہن اوہناں دی ضمانت لیندا اے۔ چیف جسٹس نے ایڈووکیٹ جنرل پنجاب نوں حکم دتا کہ پنجاب بھر وچ قائم نجی یونیورسٹیاں تے ملحقہ کالجاں دیاں تفصلاں دتیاں جان۔
