پشاور(پاکستان پوائنٹ نیوز29۔ستمبر۔2018ء) وزیر اعظم عمران خان دی کفایت شعاری پالیسی دیاں بڑیاں دُھماں نیں، وزیر اعظم عمران خان دی کابینہ دے کئی ممبراں نے وزیراعظم دی کفایت شعاری پالیسی اُتے عمل کیتا۔ وزیر اعظم عمران خان نے قوم نال وعدہ کیتا سی کہ اسیں اپنے خرچے گھٹ کراں گے تے لوکائی دے ٹیکس دے پیسیاں دی حفاظت کراں گے۔ کوئی ہور عمران خان دی ایس پالیسی اُتے عمل کرے یاں نہ کرے پر وزیر اعظم عمران خان پوری ایمانداری نال اپنے کیتے ہوئے وعدیاں اُتے قائم نیں جیہدی جھلک وزیر اعظم عمران خان دے دورہ پشاور وچ ویکھن نوں ملی۔
پچھلے دیہاڑے وزیر اعظم عمران خان پشاور اپڑے جتھے اوہناں نوں100دناں دے پلان اُتے بریفنگ دتی گئی۔ ترجمان خیبرپختونخوا حکومت شوکت یوسفزئی نے وزیراعظم دے دورے بارے گل بات کردے ہوئے آکھیا کہ وزیر اعظم پاکستان عمران خان دورہ پشاور دے موقعے اُتے بغیر پروٹوکول باچا خان ائر پورٹ توں وزیر اعلا ہاؤس اپڑے، وزیر اعظم نے وزیر اعلا محمود خان تے گورنر خیبرپختونخوا شاہ فرمان سنے چیف سیکرٹری تے کمشنر پشاور نوں اپنے استقبال لئی ائر پورٹ آن توں وی منع کیتا سی۔وزیر اعظم نے وزیر اعلا ہاؤس وچ اجلاس دی صدارت کیتی۔اجلاس ختم ہون مگروں سبھ توں اجازت لئی تے چلے گئے۔ میڈیا رپورٹ مطابق اجلاس دے رلتیاں نوں چاہ تیکر نہ ملی۔
