لاہور(پاکستان پوائنٹ نیوز28۔ستمبر۔2018ء) وزیر اعظم دیاں سختیاں تے پریشر پاروں وزیر ڈپریشن دا شکار ہون لگے۔ قومی اخبار دی رپورٹ مطابق وزیر اعظم عمران خان نے وفاقی و صوبائی وزیراں دی کارکردگی چیک کرن لئی کمیٹی بنان دا فیصلا کر لیا۔ کمیٹی خفیہ طور اُتے کارکردگی چیک کرکے مہینہ وار رپورٹ سِدھی وزیر اعظم نوں دیوے گی۔ وزیر اعظم دیاں سختیاں تے پریشر کارن وزیر اپنی وزارت دے مزے لین دی بجائے ڈپریشن دا شکار ہون لگے ۔
وزیراں دے نصیب وچ نہ تے پروٹوکول اے تے نہ ای صوابدیدی فنڈ۔اخبار مطابق وزیر نجی محفلاں اندر کئی وار اظہار کردے نیں کہ اوہ عمران خان دیاں سختیاں توں تنگ نیں تے آکھدے نیں کہ ایہدے توں اپوزیشن بہتر سی۔ وسیلیاں دا دعوا کہ اے مہینہ وار کارکردگی خراب ہون دی صورت وچ وزیراں دے محکمے بدلن توں وکھ وزارتاں وی واپس لِتیاں جا سکدیاں نیں۔ وزیراں نے کارکردگی بہتر کرن لئی زور لانا شروع کر دتااے پر ایہدے مگروں وی وزیر اعظم عمران خان کئی وزیراں دی کارکردگی توں خش نہیں نیں۔
وسیلیاں دا دعوا اے کہ ڈاڈھے ڈپریشن دا شکار کئی وزیر عمران خان دا پریشر برداشت نہ کردے ہوئے اپنے عہدیاں توں مستعفی وی ہو سکدے نیں۔ اک رپورٹ وچ دسیا گیا سی کہ تحریک انصاف دی حکومت وچ وفاقی وزیراں نوں سخت پابندیاں دا ساہمنا کرنا پے رہیا اے۔
