اسلام آباد(پاکستان پوائنٹ نیوز22۔ستمبر۔2018ء) سینیٹ وچ الیکٹرانک کرائمز دے حوالے نال ترمیمی بل 2018پیش کر دتا گیا۔ قومی اخبار وچ چھپن والی اک رپورٹ وچ دسیا گیا کہ بل دے تحت سوشل میڈیا اُتے قرآن پاک دے نسخے دی بے حرمتی کرن والے نوں عمر قید، توہین رسالت کرن والے تے توہین رسالتﷺدا جھوٹھا الزام لان والے نوں موت دی سزا تے مذہبی شخصیتاں بارے توہین آمیز بیان دے استعمال اُتے تن سال قید دی سزا تجویز کیتی گئی اے۔
بل وچ آکھیا گیا اے کہ قادیانی گروپ دے لوکاں نوں اپنے آپ نوں مسلمان آکھن یاں اپنے عقیدے دی تبلیغ کرن اُتے تن سال تیکر دی قید تے جرمانہ کیتا جائے گا۔ ایس توں وکھ بل وچ سوشل میڈیا اُتے فحش مواد تیار کرکے اپ لوڈ کرن والے نوں چار سال قید تے 30لکھ رُپئے جرمانہ جدکہ فحش مواد دی کسے وی قانونی جواز دے بغیر تقسیم اُتے تن سال تیکر قید تے 20لکھ رُپئے جرمانہ ہوئے گا۔
سینیٹ وچ ایہ بل وزیر مملکت خزانہ حماد اظہر نے پیش کیتا۔ بل مطابق کسے وی طبقے دے مذہبی احساسات نوں ٹھیس اپڑان لئی اوہناں دے مذہب دی یاں مذہبی عقیدے دے توہین آمیز مواد نوں کھلارن اُتے 10سال تیکر کسے وی نوعیت دی قید دی سزا یاں جرمانہ یاں دوویں سزاواں دتیاں جان گیاں۔ قرآن پاک دے نسخے دی بے حرمتی کرن والے نوں عمر قید دی سزا دتی جائے گی۔ توہین رسالتﷺکرن والے بندے نوں موت دی سزا دتی جائے گی تے نال جرمانہ وی کیتا جائے گا۔بل وچ توہین رسالت دا جھوٹھا الزام لان والے نوں موت دی سزا دین دی تجویز دتی گئی اے۔ توہین رسالت بارے مقدمے دی سنوائی گریڈ 18دا افسر کرے گا۔
