50لکھ گھر:وزیر اعظم دی 2ہفتیاں وچ سفارشاں تیار کرن دی ہدایت

میں آپ ایس پروگرام دی اونر شپ لواں گا،منصوبے نال لکھاں بے روزگار بندیاں نوں نوکریاں تے گھر ملن گے:وزیر اعظم عمران خان

50لکھ گھر:وزیر اعظم دی 2ہفتیاں وچ سفارشاں تیار کرن دی ہدایت
میں آپ ایس پروگرام دی اونر شپ لواں گا،منصوبے نال لکھاں بے روزگار بندیاں نوں نوکریاں تے گھر ملن گے:وزیر اعظم عمران خان

اسلام آباد(پاکستان پوائنٹ نیوز10۔ستمبر۔2018ء) تحریک انصاف دے چیئرمین و وزیر اعظم عمران خان نے 50لکھ گھراں دی اُساری لئی 2ہفتیاں وچ سفارشاں تیار کرن دی ہدایت کر دتی۔ وزیراعظم نے آکھیا کہ اوہ آپ ایس پروگرام دی اونر شپ لین گے، لکھاں بے روزگار بندیاں نوں نوکریاں تے گھر ملن گے۔ تفصیل مطابق وزیر اعظم عمران خان دی صدارت ہیٹھ ملک بھر وچ 50لکھ گھراں دی اُساری بارے جائزہ اجلاس ہویا۔

اجلاس وچ وفاقی سیکرٹری ہاؤسنگ نے وزیراعظم نوں گھراں دی سالہوار(سالانہ) ضرورتاں تے ہاؤسنگ سیکٹر وچ کمی اُتے بریفنگ دتی۔ سیکرٹری ولوں نجی شعبے نوں 50لکھ گھر منصوبے وچ شامل کرن دے قانونی طریقے اُتے وی بریفنگ دتی گئی۔ وزیر اعظم عمران خان نے کمیٹی نوں حتمی سفارشاں دو ہفتیاں وچ پیش کرن دی ہدایت کر دتی اے۔ وزیر اعظم عمران خان نے آکھیا کہ اوہ آپ ایس پروگرام دی اونر شپ لین گے۔

ایس موقعے تے وزیر اعظم نے ہدایت کیتی کہ اجیہا منصوبہ بناؤ کہ 50لکھ گھر عام بندے دی ہر ضرورت پوری کرن۔ اوہناں نے آکھیا کہ حکومت بے گھر بندیاں نوں گھر دین دا وعدہ پورا کرن لئی پرعزم اے۔ وزیر اعظم عمران خان نے آکھیا کہ 50لکھ گھراں دی اُساری(تعمیر) پی ٹی آئی حکومت دے ایجنڈے دا اہم حصہ اے۔ 50لکھ گھر منصوبے نال لکھاں بے روزگار بندیاں نوں نوکریاں ملن گیاں۔ سکیم نال ہاؤسنگ سیکٹر نال جُڑیاں صنعتاں نوں وی ترقی ملے گی۔