راولپنڈی(پاکستان پوائنٹ نیوز10۔ستمبر۔2018ء) چیف آف آرمی سٹاف جنرل قمر جاوید باجوہ نے 13دہشت گرداں دی سزائے موت دی توثیق کر دتی اے، دہشت گرد خطرناک کارروائیاں تے معصوم شہریاں دے قتل وچ ملوث سن، دہشت گرداں نوں فوجی عدالت نے سزا سُنائی سی۔ پاک فوج دے شعبہ تعلقات عامہ (آئی ایس پی آر) مطابق آرمی چیف جنرل قمر جاوید باجوہ نے 13خطرناک دہشت گرداں دی سزائے موت دی توثیق کر دتی اے۔
آئی ایس پی آر دا کہنا اے کہ ایہناں سارے دہشت گرداں نوں فوجی عدالتاں نے موت دی سزا سُنائی سی۔سارے دہشت گرد خطرناک کارروائیاں تے معصوم شہریاں دے قتل وچ ملوث سن۔ دہشت گرداں اُتے 202بندیاں نوں مارن دا الزام سی۔ ذکر کیتے گئے دہشت گرد 51سکیورٹی فورسز دے اہلکاراں نوں حملیاں وچ ہلاک کر چکے سن۔ ایسے طرحاں دہشت گرداں دیاں کارروائیاں وچ 151شہری وی ہلاک تے 249بندے زخمی ہوئے۔ ایہناں سارے دہشت گرداں نے مجسٹریٹ ساہمنے جرم قبولیا۔ جیہڑے دہشت گرداں نوں موت دی سزا سُنائی گئی اے اوہناں وچ علی شیر، حبیب اللہ، محمد آصف، منیر رحمان، محمد بشیر، گل شاہ، جلال حسین ، بخت اللہ، شیر خان، حافظ عبداللہ تے داؤد شاہ سنے ہور شامل نیں۔
