کراچی(پاکستان پوائنٹ نیوز07۔ستمبر۔2018ء) قوال کُڑی سیدہ نادیہ شاہ بخاری نے انصاف لئی سوشل میڈیا دا سہارا لے لیا۔ تفصیل مطابق سیدہ نادیہ شاہ بخاری دا اپنے اک ویڈیو پیغام وچ کہنا اے کہ میں سارے لوکاں نال اپنی کہانی شیئر کرنی اے۔ میرے کول لفظ نہیں نیں کہ میں اپنے نال ہون والا واقعہ بیان کراں۔ میں قوالی دے پیشے وچ تن سال توں آں تے میری اللہ دے سوا کسے نے مدد نہیں کیتی۔ مثبت مقام حاصل کرن لئی میں رب دے ولیاں کولوں مدد منگن درگاہواں اُتے جاندی آں۔ مینوں قوالی پڑھدے ہوئے تن سال ہو گئے پر اج تیکر کسے پولیس والے دی جرئت نہیں ہوئی کہ میرے اُتے ہتھ چُکے۔ شیر شاہ دے اندر اک دربار اے۔ اوتھے جیویں ای میری قوالی ختم ہوئی تے اک مختیار پون نامی ایس ایچ او کوئی 15گُنڈیاں نال دربار وچ آیا۔اوہناں ساریاں مینوں مارنا شروع کر دتا تے مینوں ماردے ماردے تھانے لے گئے۔ مینوں لوکاں دے اینے وڈے اکٹھ وچ بے دردی نال ماریا تے میرے پورے گھر والیاں نوں یرغمال بنایا۔ میرے اُتے ایف آئی آر کٹی گئی تے اجے وی جان توں مارن دیاں دھمکیاں مل رہیاں تے آکھیا جا رہیا اے کہ جیویں امجد صابری نوں ماریا اوسے طرحاں تینوں وی مار دیواں گے۔ قول کُڑی سیدہ نادیہ شاہ بخاری نے صدر پاکستان، چیف جسٹس، آئی جی سندھ سنے سارے وڈے حکام توں انصاف دی منگ کیتی اے۔
