لاہور(پاکستان پوائنٹ نیوز06۔ستمبر۔2018ء) پنجاب اسمبلی وچ قائد حزب اختلاف حمزہ شہباز نے آکھیا اے کہ پارٹی رہنما و کارکن ضمنی الیکشن وچ کامیابی لئی اپنا بھرپور کردار ادا کرن، لوکائی اپنے ووٹ دی طاقت نال حکومتی امیدواراں نوں رد کر کے اپنا فیصلا سُنائی گی، کارکن ساڈا اثاثہ نیں تے طاقت وچ اوہناں نوں مشاورت دے ہر عمل وچ شامل کراں گے۔ ایہناں خیالاں دا اظہار اوہناں نے پارٹی دے مرکزی سیکرٹریٹ ماڈل ٹاؤن وچ ملاقات لئی آن والے پارٹی دے سینئر رہنماواں، ٹکٹ ہولڈرز، موجودہ و سابق ارکان اسمبلی و کارکناں نال گل بات کردے ہوئے کیتا۔
حمزہ شہباز نے مسلم لیگ (ن) دے رہنما وحید گل نال اوہناں دے والد دے انتقال اُتے ہرکھ دا وکھالا تے فاتحہ پڑھی۔ ایس موقعے تے چھ ستمبر دے شہیداں ، بیگم کلثوم نواز دی صحتیابی، نواز شریف، مریم نواز تے کیپٹن (ر) صفدر دی چھیتی رہائی لئی اُچیچی دعا کیتی گئی۔ ملاقات دوران آؤندے مہینے ہون والے ضمنی الیکشن، مجموعی سیاسی صورتحال، پارٹی دے تنظیمی امور تے مستقبل دے لائحہ عمل بارے صلاح کیتی گئی۔
حمزہ شہباز نے آکھیا کہ پارٹی دیاں ساریاں تنظیماں نوں فعال کیتا جائے گا تے بھرپور اپوزیشن دا کردار ادا کراں گے۔ حمزہ شہباز شریف نے آکھیا کہ حکومت وچ آن مگروں لوکائی نوں ریلیف دین دے دعویداراں نے بجلی تے گیس بم ڈگا دتے نیں۔ اسیں بجلی تے گیس دیاں قیمتاں وچ وادھے نوں رد کردے آں تے اوہدے خلاف اسمبلی دے اندر تے باہر آواز چُکاں گے۔چیتے رہوے کہ ایس توں پہلاں پیپلز پارٹی نے وی بجلی تے گیس دیاں قیمتاں وچ وادھے خلاف احتجاج دا اعلان کیتا سی۔
