اسلام آباد،لاہور(پاکستان پوائنٹ نیوز04۔ستمبر۔2018ء) تحریک انصاف دے نامزد گورنر پنجاب چودھری محمد سرور نے سینیٹ دی رکنیت توں استعفا دے دتا۔ کل گورنر پنجاب دے عہدے دا حلف چُکن گے۔ اج صدارتی الیکشن وچ بطور سینیٹر ووٹ پان مگروں چودھری محمد سرور نے اپنا استعفا چیئرمین سینیٹ صادق سنجرانی نوں پیش کیتا۔نامزد گورنر پنجاب چودھری محمد سرور دی حلف برداری تقریب کل ہوئے گی جیہدے وچ لاہور ہائی کورٹ دے چیف جسٹس یاور علی اوہناں کولوں حلف لین گے۔
گورنر پنجاب دی تقریب حلف برداری لئی اعلا حکومتی و عسکری شخصیتاں سنے سیاسی رہنماواں نوں دعوت نامے گھلے گئے نیں۔ یاد رہوے کہ الیکشن وچ کامیابی مگروں تحریک انصاف ولوں چودھری محمد سرور نوں گورنر پنجاب دے عہدے لئی نامزد کیتا گیا سی۔
