اسلام آباد(پاکستان پوائنٹ نیوز03۔ستمبر۔2018ء) وزیر خزانہ اسد عمر دی صدارت ہیٹھ اقتصادی رابطہ کمیٹی دا اجلاس ہویا۔ اجلاس وچ اہم فیصلے کیتے گئے۔ وزیر اعظم ہاؤس سنے بل نہ دین والے ہر ادارے دی بجلی کٹ دین دا فیصلا کیتا گیا اے۔میڈیا رپورٹس وچ دسیا گیا اے کہ اجلاس وچ بجلی چوراں خلاف اہم فیصلا کیتا گیا اے۔اجلاس وچ بجلی دے سارے غیر قانونی کنکشن تن مہینے وچ ختم کرن، بجلی دابل نہ دین والیاں خلاف اوسے ویلے کارروائی کرن، بجلی چوراں تے بجلی دا بل نہ دین والیاں خلاف بغیر کسے فرق دے کارروائی کرن دا فیصلا کیتا گیااے ۔
اقتصادی رابطہ کمیٹی دے اجلاس وچ تجویز پیش کیتی گئی کہ بجلی دے پری پیڈ میٹر لائے جان، ونڈ کار کمپنیاں پری پیڈ میٹرز اُتے کم کرن۔رپورٹس وچ ہور دسیا گیا اے کہ پاور سیکٹر دا فنانشل آڈٹ ہوئے گا، اجلاس وچ وزیر اعظم ہاؤس سنے ہر اوس ادارے دی بجلی کٹ دین دا فیصلا کیتا گیا جو بجلی دا بل نہیں دیوے گا۔اجلاس وچ سابق حکومت دیاں 400ارب رُپئے سرکلر ڈیڈ دیاں ادائیگیاں غیر تسلی بخش قرار دے دتیاں گئیاں، تے ایس سلسلے وچ اوہدے وچ گڑ بڑ کرن والے افسراں دا تعین تے اوہناں خلاف کارروائی کرن دا وی فیصلا کیتا گیا اے۔اقتصادی رابطہ کمیٹی نے کھاد دے کارخانے چھیتی چلان دا فیصلا وی کیتا اے۔ کھاد کارخانیاں توں مقامی کھاد دی لوڑ پوری کیتی جائے گی۔
