اسلام آباد(پاکستان پوائنٹ نیوز30۔اگست۔2018ء) وفاقی وزیر ریلوے شیخ رشید ولوں ہفتے دی چھٹی ختم کرکے ریلوے افسراں دے ویلے وچ اک گھنٹے دا وادھا کرن دا فیصلا کیتا گیا اے۔ ریلوے دے ملازماں نے وفاقی وزیر دے ایس فیصلے اُتے ملے جُلے ردعمل دا اظہار کیتا اے۔ تفصیل مطابق وزیر ریلوے شیخ رشید نے ریلوے ملازماں لئی ہفتے دی چھٹی ختم کرن دا اعلان کر دتا۔
پر ملازماں دا کہنا سی کہ ہفتے دی چھٹی ہوندی ای نہیں، صرف ایتوار دی چھٹی ہوندی اے۔ اوہناں نے ہور آکھیا کہ جو چھٹی ختم کیتی اے اوہ منسٹری لیول اُتے ختم کیتی گئی اے۔ ریلوے ملازم تے پہلے ای کم کردے سن تے ہن وی کردے رہن گے پر عام ملازم خش نیں کہ ہن افسراں دے مزے وی ختم ہوئے۔ ہن اوہناں نوں وی اوہناں دے برابر کم کرنا پئے گا۔ ریلوے دے ملازماں دا کہنا اے کہ اوہ تے پہلے وی ہفتے دے چھ دن کم کردے سن۔ اوہناں نوں ایس فیصلے نال کوئی فرق نہیں پئے گا پر افسراں دی گل وکھ اے۔
