تحریک انصاف دی حکومت دا وڈا فیصلا

اسلام آباد(پاکستان پوائنٹ نیوز28۔اگست۔2018ء) وفاقی حکومت نے حساس ادارے سنے کئی اہم اداریاں دے سربراہ برطرف کر دتے، ڈاکٹر سلیمان نوں ڈی جی آئی بی تے مہر خالق داد لک نوں نیکٹا دا کوآڈینیٹر تعینات کر دتا گیا، صدر نیشنل بنک نوں وی برطرف کرن دا فیصلا، وفاقی کابینہ نے وفاقی حکومت دے سینئر افسراں دے تبادلیاں دی توثیق کر دتی۔ تفصیل مطا بق تحریک انصاف دی وفاقی حکومت نے بیوروکریسی وچ وڈی پدھر اُتے تبادلیاں دا سلسلا شروع کر دتا اے۔

ایس سلسلے وچ اج وفاقی حکومت نے ملک دے اہم سول و حساس اداریاں دے سربراہواں نوں بدلن دا فیصلا کیتا اے۔ وفاقی حکومت نے حساس ادارے سنے ہور کئی اہم اداریاں دے سربراہواں نوں برطرف کردتا اے۔ وفاقی حکومت ولوں جیہڑے اداریاں دے سربراہواں نوں برطرف کیتا گیا اے، اوہناں وچ انٹیلی جنس بیورو، نیشنل بنک آف پاکستان، نیکٹا تے ہور شامل نیں۔ وفاقی حکومت نے انٹیلی جنس بیورو دے سربراہ نوں بدلدے ہوئے ڈاکٹر سلیمان نوں انٹیلی جنس بیورو دا سربراہ تعینات کر دتا اے ۔ ایس توں وکھ وفاقی حکومت نے صدر نیشنل بنک سعید احمد نوں وی برطرف کرن دا فیصلا کیتا اے۔ دوجے پاسے وفاقی حکومت نے سکیورٹی امور دے اہم ادارے نیکٹا لئی مہر خالق داد لک نوں نیکٹا دا کوآڈینیٹر تعینات کر دتا اے۔