اسلام آباد(پاکستان پوائنٹ نیوز25۔اگست۔2018ء) وزیر خارجا شاہ محمود قریشی دا کہنا اے کہ مینوں اپنی بولی اُتے فخر اے، ایہ میری قومی شناخت اے تے میں انگریزی زبان دا محتاج نہیں آں۔ میں اقوام متحدہ دے اجلاس وچ وی قومی زبان وچ تقریر کراں گا تے ایہو نواں پاکستان ہوئے گا۔ تفصیل مطابق وزیر خارجا شاہ محمود قریشی دا کہنا اے کہ اقوام متحدہ وچ بے شک بین الاقوامی لوک ہون گے۔
پر میں اوتھے اُردو وچ گل کیوں نہیں کر سکدا؟مینوں اپنی بولی اُتے فخر اے۔ ایہ میری قومی شناخت اے۔ وزیر خارجا دا ہور کہنا سی کہ جدوں چینی وزیر خارجا میرے نال ہوندے سن تے اوہ بہت زبردست انگریزی بولدے سن پر فیر وی جدوں اوہناں دی میرے نال گل بات ہوندی سی تے اوہ چینی زبان وچ گل بات کردے سن۔ فیر اوہناں دا انٹرپریٹر اوہدا ترجمہ کردا سی تے جدوں میں اوہدا انگریزی وچ جواب دیندا سی تے اوہ جھٹ وچ مینوں جواب دے دیندے سن۔
کیونکہ اوہ انگریزی جاندے سن پر ایہدے مگروں وی اوہ قومی زبان وچ گل کرنا پسند کردے سن۔ اوہناں دا ہور کہنا سی کہ میں وی سنجیدگی نال سوچ رہیا واں کہ میں وی اقوام متحدہ اجلاس وچ اپنی قومی زبان وچ گل بات کراں۔ تے جے مینوں دفتر خارجا والے اجازت دین تے میں اقوام متحدہ وچ اُردو زبان وچ گل کراں گا کیونکہ میں انگریزی زبان دا محتاج نہیں آں۔ تے ایہو ہوئے گا نواں پاکستان۔
