نواز شریف دی والدہ شمیم بی بی وی میدان وچ آگئیاں

نواز شریف جدوں وی وزیر اعظم بنیا خرچہ اسیں گھلدے ساں:والدہ دابیان

نواز شریف دی والدہ شمیم بی بی وی میدان وچ آگئیاں
نواز شریف جدوں وی وزیر اعظم بنیا خرچہ اسیں گھلدے ساں:والدہ دابیان

لاہور(پاکستان پوائنٹ نیوز21۔اگست۔2018ء) سابق وزیر اعظم نواز شریف ولوں اپنی حکومت وچ خرچہ اپنی جیب وچوں کرن دے معاملے اُتے کل دی بحث جاری اے۔ پچھلے دیہاڑے احتساب عدالت وچ پیشی مگروں اڈیالا جیل جان توں پہلاں عدالت دے باہر سابق وزیر اعظم نواز شریف نے میڈیا نال غیر رسمی گل بات کردے ہوئے آکھیا کہ میں وزیراعظم ہاؤس دے خرچے اپنے کولوں کردا سی تے اوہدے ثبوت چیکس دی صورت وچ موجود نیں۔

پر ہن اوہناں دی والدہ وی میدان وچ آگئیاں نیں۔ نواز شریف دی والدہ نے آکھیا کہ ہن کیہ آکھ سکنی آں ، ایہ سبھ میرے پُتر پچھے پے گئے نیں۔ اوہناں نوں بس نواز ای نظر آؤندا اے؟میرے پُتر نے نہ کرپشن کیتی نہ کوئی پیسا کھادا۔ سابق وزیر اعظم نواز شریف دی والدہ شمیم شریف نے آکھیا کہ نواز شریف جدوں وزیراعظم بنیا اوہناں نوں ہر مہینے خرچہ اسیں گھلدے رہے آں۔

اوہناں نے آکھیا کہ اوہناں دے والد نے کدی نواز شریف نوں سرکاری کھانا نہیں کھان دتا سی۔وائس آف امریکا نوں انٹرویو دیندے ہوئے محترمہ شمیم بیگم نے آکھیا کہ میں ایس توں پہلاں کدی میڈیا نال گل بات نہیں کیتی۔ مینوں کدی میڈیا نال گل کرن دی ضرورت ای نہیں پئی۔ کدی انج دے حالات نہیں سن۔ ساری زندگی میں کدی انج دے حالات نہیں ویکھے کہ مینوں میڈیا نال گل کرنی دی ضرورت پئی ہوئے۔

اوہناں نے آکھیا کہ میرے پُتر اُتے جھوٹھے الزام لگ رہے نیں۔ کلثوم نواز نال نواز شریف دے تعلقات بارے اک سوال دے جواب وچ اوہناں نے آکھیا کہ اوہناں دے آپس وچ چنگے تعلقات نیں۔ کدی آپس وچ جھیڑا نہیں ہویا۔ اوہناں داآکھناسی کہ نواز شریف بیوی دی ہر گل نوں پورا کرن والا سی ایس لئی اوہناں دا کدی جھیڑا ای نہیں ہویا سی۔ چیتے رہوے کہ سابق وزیر اعظم نواز شریف دی والدہ ایس توں پہلاں وی کئی وار آکھ چُکیاں نیں کہ میرے پُتر اُتے جھوٹھے الزام لا کے اوہنوں گرفتار کیتا گیا تے جیل گھلیا گیا۔