اسلام آباد(پاکستان پوائنٹ نیوز21۔اگست۔2018ء) مسلم لیگ (ن) دے دور وچ ارکان پارلیمنٹ نے بہت ساریاں سہولتاں توں فائدہ چُکیا۔ مسلم لیگ (ن) دے دور وچ ارکان پارلیمنٹ ولوں 20کروڑ رُپئے دیاں دوائیاں استعمال کرن دا انکشاف ہویا اے۔ قومی اخبار وچ چھپن والی اک رپورٹ مطابق سابق وزیر اعظم نواز شریف دی حکومت وچ ارکان نے جتھے علاج لئی کروڑاں رُپئے دے باہرلے ملکاں دے دورے کیتے اوتھے پارلیمنٹ دی ڈسپنری توں 20کروڑ رُپئے توں ودھ دیاں مفت دوائیاں وی لئیاں۔
وسیلیاں دا کہنا اے کہ پچھلی حکومت وچ پولی کلینک ہسپتال دی پارلیمنٹ ہاؤس تے پارلیمنٹ لاجز وچ موجود ڈسپنسریاں اُتے تعینات عملے نوں ہدایت کیتی گئی سی کہ اوہ ارکان پارلیمان تے وزیراں نوں مہنگیاں دوائیاں، فوڈسپلی منٹس تے ہور آئٹمز لوکل پرچیز سسٹم دے تحت دین۔ لوکل پرچیز سسٹم دے تحت (ن) لیگ دے وزیراں و ارکان پارلیمنٹ ہسپتال عملے دی مدد نال ڈاکٹر ی نسخے دی پرچی بنوا لیندے سن جدکہ دوائیاں باہر دے میڈیکل سٹورز توں مُل لیندے سن۔
دوائیاں مُل لین وچ ڈسپنسریاں تے ڈاکٹری عملے دی مددوی شامل ہوندی سی۔ پیپلز پارٹی دی حکومت وچ سینیٹرز لئی تاحیات علاج تے دوائیاں دی فراہمی مفت بنان دا بل پاس کروایا گیا جیہدے تحت سینیٹرز مدت پوری کرن مگروں وی لکھاں دیاں دوائیاں سرکاری خزانے توں مُل لیندے دے مجاز قرار دتے گئے۔ وسیلیاں نے ہور وی دسیا کہ اک پاسے جتھے (ن) لیگ دے وزیراں تے ارکان پارلیمان لئی کروڑاں دیاں دوائیاں دی مفت فراہمی ممکن بنائی جا رہی سی اوتھے دوجے پاسے غریب لوک صرف دوا نہ ملن دی وجہ توں موت دے مونہ وچ جا رہے سن۔
پر ہن تازہ اطلاع مطابق نویں کابینہ نے وزیراں تے ارکان پارلیمان دی باہرلے ملکوں علاج دی سہولت ختم کرن دا اعلان کیتا اے۔ جیہدے مگروں ہن کوئی وی رکن پارلیمنٹ جے باہرلے ملک علاج لئی جاندا اے تے اوہنوں سرکار ولوں کوئی پیسے نہیں ملن گے۔
