امریکا(پاکستان پوائنٹ نیوز20۔اگست۔2018ء) پاکستان تحریک انصاف دے سربراہ عمران خان پاکستان دے 22ویں وزیراعظم بن گئے نیں۔ وزیر اعظم عمران خان نے پچھلے دیہاڑے وزیر اعظم دی حیثیت نال قوم نال پہلا خطاب کیتا جو پاکستانی لوکائی ولوں ڈاڈھا پسند کیتا گیا۔وزیر اعظم عمران خان دے پچھلے دیہاڑے خطاب نوں نہ صرف پاکستانی لوکائی بلکہ باہرلے ملک مقیم پاکستانیاں نے وی ڈاڈھا پسند کیتا۔
وزیراعظم عمران خان دے خطاب مگروں باہرلے ملک وسدے پاکستانیاں دا ردعمل وی ساہمنے آیا۔امریکا وچ مقیم پچھلے 10ورھیاں توں پاکستانی نژاد ڈاکٹر نے اپنی جائیداد ویچ کے پاکستان آن دا فیصلا کیتا۔ سوشل میڈیا اُتے وائرل ہوئی ویڈیو وچ ذکر کیتے گئے ڈاکٹر نے دسیا کہ میرا ناں ڈاکٹر عمران اے تے میں امریکا وچ پچھلے دس ورھیاں توں رہ رہیا واں تے ایتھے فزیشن دے طور اُتے کم کر رہیا واں۔
ڈاکٹر عمران نے دسیا کہ میں امریکا وچ نیونیٹولوجی دے اندر ریجنل ڈائریکٹر وی آں۔ ہن توں کُجھ دیر پہلاں میں اپنے وزیراعظم عمران خان دا خطاب سُنیا، جیہدے وچ اوہناں نے آکھیا کہ اوورسیز پاکستانی ودھ چڑھ کے اپنے ملک دی ترقی لئی اک اہم کردار نبھا رہے نیں۔ تے میں تہانوں سارے لوکاں نوں دسنا چاہناں واں کہ میں فیصلا کرلیا اے کہ میں پاکستان واپس آ رہیا واں۔
میں آکے اپنے ملک دی خدمت کراں گا ۔ڈاکٹر عمران خان نے آکھیا کہ امریکا وچ میرا جھیل کنڈھے گھر اے۔ میری ایتھے جنی وی جائیداد اے میں اوہ ویچ کے سارے ڈالرز پاکستان لیاواں گا تے اپنے ملک نوں موجودہ مسائل توں رلکے کڈھاں گے۔ ڈاکٹر عمران خان نے آکھیا کہ میری گھر والی وی ایتھے فزیشن اے، میں اوہننوں وی نوکری توں استعفا دین دا آکھ دتا اے۔ تے میرا پورا خاندان ایتھے سبھ کُجھ چھڈ کے اپنے ملک دی خدمت کرن لئی واپس آ رہیااے تے مینوں آس اے کہ باقی اوورسیز پاکستانی وی اپنے ملک دی ترقی وچ اہم کردار نبھان گے۔کیونکہ رب نے سانوں ایہ موقع دتا اے تے سارے لوکاں نے رلکے ایس ملک نوں اک عظیم ملک بنانا اے بھاویں کوئی پاکستان وچ اے یاں پاکستان توں باہر ۔
