لاہور(پاکستان پوائنٹ نیوز18۔اگست۔2018ء) پنجاب دی وزارت اعلا لئی پاکستان تحریک انصاف ولوں نامزد کیتے گئے امیدوار عثمان بزدار کروڑ پتی نکلے۔ تفصیل مطابق نویں چُنے گئے وزیر اعظم عمران خان نے پچھلے دیہاڑے پنجاب دی وزارت اعلا لئی عثمان بزدار نوں امیدوار نامزد کیتا۔ عثمان بزدار دی نامزدگی اُتے عمران خان نے اک ویڈیو پیغام وی جاری کیتا۔ اپنے پیغام وچ عمران خان دا کہنا سی کہ عثمان بزدار دا ہیٹھلے علاقے توں تعلق اے ۔
اوہناں دے گھروکی حالات بارے گل بات کردے ہوئے عمران خان دا کہنا سی کہ اوہناں دا تعلق اک غریب علاقے توں اے تے اوہ آپ وی غربت ویکھ چکے نیں۔اوہناں نے آکھیا کہ عثمان بزدار لوکائی دی فلاح لئی کم کرن گے۔ سردار عثمان پاکستان دے اوہ واحد ایم پی اے نیں جیہناں دے گھر بجلی وی نہیں اے۔ انشااللہ ساڈے ہیٹھلے طبقے نوں اُتانہہ لیجان بارے جو ویژن اے اوس ویژن نوں پورا کرن وچ عثمان بزداراپنا بھرپور کردار نبھان گے۔
پر ہن عثمان بزدار دے اثاثیاں دیاں تفصیلاں ساہمنے آگئیاں نیں، جیہدے مطابق پاکستان تحریک انصاف ولوں نامزد امیدوار عثمان بزدار لکھاں نہیں کروڑاں رُپئے مالیت دے اثاثیاں دے مالک نیں۔ عثمان بزدار ولوں جمع کروائیاں گئیاں دستاویزات مطابق اوہناں دے اثاثیاں دی کل مالیت ڈھائی کروڑ رُپئے اے۔ دستاویزات وچ دسیا گیا اے ک اوہناں کول 24لکھ رُپئے مالیت دے 3ٹریکٹر تے 36لکھ رُپئے مالیت دیاں دو گڈیاں نیں۔
دستاویزات مطابق عثمان بزدار کول 20تولے سونا تے 50ہزار رُپئے دا فرنیچر اے جدکہ چار بنکاں وچ اکاؤنٹس نیں۔ ایس توں وکھ اوہناں نے تن انشورنس پالیسیاں وی لئیاں نیں۔ عثمان بزدار دے اثاثیاں دیاں تفصیلاں ساہمنے آؤندے ای پاکستان تحریک انصاف نوں تنقید دا نشانہ بنایا جارہیا اے۔ سیاسی ناقداں دا کہنا اے کہ عمران خان مطابق عثمان بزدار اک غریب گھرانے توں تعلق رکھدے نیں تے اوہناں دے گھر بجلی وی نہیں اے ۔ جے انج ای تے اوہناں دے کًروڑاں رُپئے دے اثاثے کتھوں آگئے۔
