ہری پور(پاکستان پوائنٹ نیوز18۔اگست۔2018ء) جمعیت علماء اسلام نظریاتی دے صوبائی رہنما مولانا قاضی گل رحمن نکیال نے آکھیا اے کہ نویں چُنے گئے وزیر اعظم عمران خان سبھ توں پہلاں ختم نبوت ایکٹ نوں سابق حیثیت وچ بحال کرن۔اوہناں دا کہنا سی کہ ہری پور دے دورے دے موقعے اُتے عمران خان نے الیکشن وچ کامیابی دی صورت وچ سبھ توں پہلاں ختم نبوت ایکٹ دی بحالی دا وعدہ کیتا سی، ہن اوہ ایس وعدے نوں نبھاندے ہوئے سبھ توں پہلاں ختم نبوت ایکٹ نوں بحال کرن۔
ایس توں وکھ مولانا فضل رحمن نکیال نے جامع مسجد مدنی اڈہ ربند دے ساہمنیوں گند نہ چُکے جان اُتے احتجاج کردے ہوئے آکھیا کہ ٹی ایم اے عملے ولوں گند نہ چُکن دی وجہ توں مسجد ساہمنے گند دے ڈھیر لگ جاندے نیں ۔اوہ ایہ گند آپ چُکن اُتے مجبور ہوندے نیں کیونکہ مسجد ساہمنے گنددی وجہ توں نمازیاں تے پڑھیاراں نوں اوکڑاں دا ساہمنا اے۔ ایس لئی ضلعی انتظامیہ خاص کر ٹی ایم اے نوں ایس صورتحال دا نوٹس لینا چاہیدا۔
