اسلام آباد(پاکستان پوائنٹ نیوز18۔اگست۔2018ء) وزیراعظم عمران خان دے حلف چُکدے ای ڈالر دی قدر وچ وادھاہوگیا۔ میڈیا رپورٹ مطابق اوپن مارکیٹ وچ ڈالر دی قیمت وچ 10پیسے دا وادھا ہو گیا اے۔ کاروباری ہفتے دے آخیر اُتے ڈالر 124رُپئے 4پیسے دا ہو گیا۔ اوپن مارکیٹ وچ ڈالر دی قیمت فروخت 122.60رُپے رہی۔ دوجے پاسے ہفتے دے دوران اک ہزار اک سو پندرھاں پوائنٹس دے بینڈ وچ کاروبار ہویا۔
ہفتے دے دوران 64کروڑ شیئرز دے سودے ہوئے۔ 31ارب 84کروڑ رُپئے مالیت دا کاروبار ہویا۔ مارکیٹ کیپٹلائزیشن 61ارب گھٹ ہو کے 8703ارب رُپئے ہو گئی۔ سیاسی مبصرین د ا کہنا اے کہ وزیر اعظم عمران خان نے اپنے عہدے دا حلف تے چُک لیا اے پر عمران خان لئی اصل چیلنج ہن شروع ہویا اے۔وزیر اعظم عمران خان دی کابینہ نوں پہلے دن ای عملی اقدامات کرنے پین گے تے نویں کابینہ لئی سبھ توں وڈا چیلنج ملکی معیشت وچ بہتری لیانا ہوئے گا۔
ایس حوالے نال عمران خان نے پہلے ای نامزد وزیر خزانہ اسد عمر نوں ٹاسک دتا ہویا اے تے ایہو وجہ اے کہ اسد عمر انتخابات وچ پاکستان تحریک انصاف دی نمایاں کامیابی مگروں کسے وی ملاقات وچ کیتے نظر نہیں آئے کیونکہ عمران خان نے اوہناں نوں ڈالر دی قدر وچ کمی لیان تے ایس طرحاں دے ہور معاشی مسائل حل لبھن دا ٹاسک دتا سی۔
