لاہور(پاکستان پوائنٹ نیوز17۔اگست۔2018ء) پاکستان مسلم لیگ (ق) دے صدر و سابق وزیر اعظم چودھری شجاعت حسین نے آکھیا اے کہ عمران خان پہلا وزیر اعظم اے جو لوکائی دی طاقت نال بن کے آیا اے ایس توں پہلاں میرے سنے 21وزیراعظم بنائے جاندے سن اوہناں وچوں دو وزیر اعظم میں آپ اپنے ہتھ نال بنوائے سن۔ اوہناں نے عمران خان نوں دلی مبارکباد دیندے ہوئے آکھیا کہ عمران خان 22سال اک مقصد تے اک سوچ نال محنت کر کے وزیر اعظم چُنے گئے جدکہ ایس توں پہلاں کوئی وی ایسے وزیر اعظم نہیں سن جو عملی طور اُتے کوششاں کر کے ایس عہدے تیکر اپڑے نیں۔
اوہناں مخالفاں نوں مخاطب کردے ہوئے آکھیا کہ اپنے اختلافات نوں بُھل جاؤ تاں جے عمران خان اپنے 22ورھیاں دے مقصد نوں پورا کر سکے۔ چودھری شجاعت حسین نے ہور آکھیا کہ میں عمران خان دا مشکور آں کہ اوہناں نے ساڈے اُتے جو اعتماد کیتا تے چودھری پرویز الہی نوں سپیکر پنجاب اسمبلی دے عہدے لئی نامزد کیتا۔
