اسیں اسمبلی اُتے لعنت نہیں گھلاں گے،الیکشن کمیشن شفاف الیکشن کروان وچ ناکام رہیا، پورے ملک وچ دھاندلی زدہ الیکشن ہویا:شہباز شریف دا اسمبلی وچ خطاب

اسیں اسمبلی اُتے لعنت نہیں گھلاں گے،الیکشن کمیشن شفاف الیکشن کروان وچ ناکام رہیا، پورے ملک وچ دھاندلی زدہ الیکشن ہویا:شہباز شریف دا اسمبلی وچ خطاب

اسلام آباد(پاکستان پوائنٹ نیوز17۔اگست۔2018ء) الیکشن کمیشن شفاف الیکشن کروان وچ ناکام رہیا، پورے ملک وچ دھاندلی زدہ الیکشن ہویا، آڈٹ کرواکے ذمے واراں نوں سزا دتی جائے،میڈیا نوں پولنگ سٹیشن جان دی اجازات نہیں سی، شہراں دا بعدوں تے پنڈاں دے نتیجے پہلاں آئے، اک سیاسی پارٹی نوں نشانہ بنا کے 16ہزار 86کارکناں خلاف پرچے کٹے گئے۔ دہشت گردی دیاں ایف آئی آرز کٹیاں گئیاں۔

تفصیل مطابق عمران خان ملک دے 22ویں وزیر اعظم چُنے گئے۔قومی اسمبلی وچ اج قائد ایوان لئی ووٹنگ ہوئی۔ ووٹنگ دوران عمران خان نوں176تے اوہناں دے مقابلے وچ وزیر اعظم دے امیدوار شہباز شریف نوں 96ووٹ پئے۔ عمران خان دی کامیابی مگروں شہباز شریف دا اسمبلی وچ خطاب کردے ہوئے کہنا سی کہ سبھ توں ودھ دھاندلی دے نتیجے وچ ایہ پارلیمنٹ وجود وچ آئی اے ۔

اوہناں دا کہنا سی کہ پورے پاکستان وچ دھاندلی زدہ الیکشن دا ہر زبان اُتے ذکر اے۔ پوری دنیا وچ اخباراں تے رسالیاں اندر دھاندلی دا پوری طرحاں رولا اے۔ ایہ کس طرحاں دا الیکشن ؟ الیکشن کمیشن دی ذمے واری سی اوہ پوری طرحاں ناکام ہویا۔ اوہناں دا کہنا سی کہ چترال توں لے کے رات دے گیارھاں وجے آر ٹی ایس سروس کسے نے بند کر دتی۔ ایہ کداں دا الیکشن سی کہ پورے پاکستان وچ ہر حلقے دے پولنگ ایجنٹ نوں کڈھ دتا گیا۔

کُجھ ایداں دے حلقے سن جتھے رد ووٹاں دی گنتی جت دے ووٹاں توں کیتے ودھ سی۔ فارم 45دی تھاں پرچیاں دتیاں گئیاں۔اوہناں دا کہنا سی کہ الیکشن دے نتیجے تن دن تیکر نہیں آئے۔ میڈیا نوں پولنگ سٹیشن جان دی اجازات نہیں سی۔ شہراں دے بعدوں تے پنڈاں دے نتیجے پہلاں آئے۔ ایہ کس طرحاں دا لیکشن سی جتھے پولنگ دے عمل نوں سست کیتا گیا۔ پورے پاکستان وچ تاریخ دے سبھ توں ودھ ووٹ یعنی 14لکھ ووٹ رد ہوئے۔

اک سیاسی پارٹی نوں نشانہ بنا کے 16ہزار 86کارکناں خلاف پرچے کٹے گئے۔ دہشت گردی دیاں ایف آئی آرز کٹیاں گئیاں۔ ہن گلی محلیاں وچوں بیلٹ پیپرز برآمد ہو رہے نیں۔شہباز شریف نے منگ کیتی کہ پارلیمانی کمیشن بنایا جائے جو دھاندلی دیاں تحقیقات کرے۔ آڈٹ کروایا جائے تے ذمے واراں دا پتا لاکے اوہناں نوں سزا دتی جائے تاں جے فیر رہندی دنیا تیکر کوئی ووٹ چوری نہ کر سکے۔ اوہناں دا کہنا سی کہ اسیں ایوان اُتے لعنت نہیں گھلاں گے۔ اسیں سپریم کورٹ اُتے حملا نہیں کراں گے۔ اسیں سپریم کورٹ دے ججاں نوں راہ بدلن دا نہیں آکھاں گے۔ اسیں بجلی بلاں نوں اگ نہیں لواں گے۔ اسیں غیر ملکی پروہنیاں دے دوریاں نوں منسوخ نہیں ہون دیواں گے۔