لاہور(پاکستان پوائنٹ نیوز15۔اگست۔2018ء) چودھری نثارتے عظمی زعیم قادری حلف چُکن لئی پنجاب اسمبلی نہ آئے۔ تفصیل مطابق پنجاب اسمبلی دے اج ہون والے اجلاس دوران جتھے نویں چُنے گئے ارکان اسمبلی نے حلف چُکیا اوتھے (ن) لیگ دے ناراض رہنما و سینئر سیاستدان چودھری نثار علی خان تے عظمی زعیم قادری پنجاب اسمبلی دی رکنیت دا حلف چُکن لئی پنجاب اسمبلی نہ آئے۔
چودھری نثا رعلی خان قومی اسمبلی دیاں دوویں سیٹاں ہار گئے سن پر اوہناں نے صوبائی اسمبلی دی سیٹ توں کامیابی حاصل کیتی سی جدکہ زعیم قادری دی گھر والی وی اج حلف چُکن لئی نہیں آئیاں۔چیتے رہوے کہ (ن) لیگی رہنما زعیم قادری نے وی الیکشن توں پہلاں پارٹی خلاف بغاوت دا اعلان کیتا۔ زعیم قادری نے حمزہ شہباز شریف تے پارٹی قیادت دے رویے خلاف بغاوت کردے ہوئے آزاد حیثیت نال الیکشن لڑن دا اعلان کیتا سی پر اوہ الیکشن ہار گئے۔
اوہناں نے مسلم لیگ (ن) دی قیادت نال ناراضگی مگروں پریس کانفرنس کرد ے ہوئے آکھیا کہ میں 8اکتوبر 1999نوں مسلم لیگ (ن) وچ اک نِکے کارکن دی حیثیت نال عملی سیاست شروع کیتی۔اوہدی وڈی وجہ میرے خون وچ مسلم لیگ سی، ہے تے رہوے گی۔ میرے والد، تے دادے نے قائد اعظم دے آکھن اُتے ایس خطاب نوں لین توں انکار کر دتا، جو انگریز نے اوہناں نوں دتا سی، ایہ گلاں ایس لئی کر رہیا واں کہ ایہ گلاں میں کدی وی نہیں کیتیاں۔
اوہناں نے آکھیا کہ میرے والد نے ایوب خان، یحی خان، ضیاء الحق تے ذوالفقار دی سول آمریت وچ جیلاں کٹیاں۔ میں والد دے نقش قدم اُتے مسلم لیگ (ن) دے پلیٹ فارم توں سیاسی کوششاں شروع کیتیاں۔ مسلم لیگ (ن) دا ترجمان رہیا، سیکرٹری اطلاعات وی رہیا۔ جو اج عہدیاں اُتے بیٹھے نیں اوہ سانوں اودوں بے وقوف آکھدے سن، کہ تُسیں کیہڑی کندھ نال ٹکر ما ر رہے او۔
پر 2002دے الیکشن وچ محترمہ کلثوم نواز تے نواز شریف دا امیدوار سی۔ پر میری تھاں کُجھ ہور لوکاں نوں اگانہ کر دتا گیا۔اوہناں دا کہنا سی کہ 2008دے شروع وچ فون اُتے دسیا کہ تہاڈی شکل پسند نہیں ایس لئی جنرل سیکرٹری دا عہدہ چھڈ دیو۔ میں دوجا کوئی سوال نہیں کیتا۔ اوہناں نے آکھیا کہ پچھلے دس ورھیاں توں اوہ لوک جو پارٹی وچ نہیں سن ایہناں نوں وزیر بنایا گیا۔
