عمران خان نوں کاغذات نامزدگی وچ بشری بی بی دی جائیداد لُکانا مہنگا پے گیا

پشاور( پاکستان پوائنٹ نیوز09۔اگست۔2018ء ) عمران خان نوں کاغذات نامزدگی وچ بشری بی بی دی جائیداد لُکانا مہنگا پے گیا۔ چیئرمین تحریک انصاف خلاف پشاور ہائی کورٹ وچ درخاست جمع،نوٹس جاری۔ تفصیل مطابق پاکستان تحریک انصاف ایس ویلے حکومت بنان دے آخری مرحلے وچ اے۔ ملک بھر دیاں چھوٹیاں وڈیاں جماعتاں نے عمران خان دی حمایت دا اعلان کیتا اے۔ جیہدے وچ جی ڈی اے، ایم کیو ایم، بلوچستان نیشنل پارٹی، بلوچستان عوامی پارٹی، جمہوری وطن پارٹی تے مسلم لیگ (ق) شامل اے۔

ایہناں ساریاں جماعتاں دی حمایت مگروں تحریک انصاف نوں وفاق وچ عددی اکثریت حاصل ہو گئی اے۔ تحریک انصاف وفاق وچ اپنی حکومت بنان نوں تیار اے تے عمران خان نے وزارت عظمی دا عہدہ سنبھالن لئی تیاریاں شروع کر دتیاں نیں۔ ایس موقعے تے عمران خان نوں بُری خبر سنا دتی گئی اے۔ کپتان لئی رحمت سمجھی جان والی اوہناں دی بیوی بشری بی بی دی وجہ توں کپتان نوں پریشانی دا ساہمنا کرنا پے گیا۔

عمران خان نوں این اے 35بنوں دے کاغذات نامزدگی وچ بشری بی بی دی جائیداد لُکانا مہنگا پے گیا۔ ایس کم اُتے چیئرمین تحریک انصاف خلاف پشاور ہائی کورٹ وچ درخاست جمع کروائی گئی اے۔ درخاست وچ آکھیا گیا اے کہ این اے 35بنوں دے کاغذات نامزدگی وچ عمران خان نے بشری بی بی دی جائیداد دا ذکر نہیں کیتا تے نہ ای سیتا وائٹ توں اپنی دھی ٹیریان دا ذکر کیتا اے۔ درخاست اُتے پشاور ہائی کورٹ نے عمران خان نوں نوٹس جاری کر دتا۔