لاہور( پاکستان پوائنٹ نیوز09۔اگست۔2018ء ) ارباں رُپئے کسارے(خسارے) وچ ڈُبی پی آئی اے دی باکمال سروس دا اک ہور کارنامہ ساہمنے آیا اے۔ تفصیل مطابق پاکستان ائر لائن اپنی سروس دی وجہ توں خبراں دی زو وچ رہندی اے۔ آئے دن پی آئی اے دے مختلف کارنامیاں دیاں خبراں ساہمنے آؤندیاں رہندیاں نیں۔ جو پی آئی اے دے عملے دی لاپرواہی دا مونہ بولدا ثبوت اے۔
پاکستان دی قومی ائر لائن دا اک ہور وڈا کارنامہ ساہمنے آیا اے۔ میڈیا رپورٹس وچ دسیا گیا اے کہ پاکستان ائر لائنز ولوں شوبز ستاریاں نوں مفت ٹکٹ دین دا انکشاف ساہمنے آیا اے۔ کراچی توں اسلام آباد96دو پاسی ٹکٹ جاری کیتے گئے۔ جیہناں دا مُل 28لکھ توں ودھ دسیا جا رہیا اے۔ تن مہینے لنگھن مگروں وی ٹکٹ دی مد وچ لکھاں رُپئے نہ لتے گئے۔ جدکہ پی آئی اے حکام وی ایس بارے جواب دین نوں تیار نہیں نیں۔
وسیلیاں مطابق مفت ٹکٹ دین دی ہدایت مبینہ طور اُتے سابق وزیر اطلاعات مریم اورنگزیب نے دتی۔ ایس حوالے نال ٹکٹ جاری کرن والے منیجر فنانس ائر لائن ہیڈ آفس توں مدد منگی گئی اے۔ چیتے رہوے کہ پی آئی اے بارے شکایتاں ساہمنے آؤندیاں رہندیاں نیں۔ پی آئی اے دے مسافر وی قومی ائر لائن اُتے ڈاڈھی تنقید کردے نیں۔ کئی وار پاکستان قومی ائر لائنز دے مسافراں نے احتجاج کیتا اے۔ کدی مسافرں دا سامان گھٹ ہو جاندا اے تے کدی فلائٹ نوں دیر ہو جاندی اے۔
