راولپنڈی( پاکستان پوائنٹ نیوز09۔اگست۔2018ء ) پاکستان مسلم لیگ (ن) دے صدر محمد شہباز شریف نے آکھیا اے کہ اسمبلی وچ وزیر اعظم نوں مبارکباد دین نہیں احتجاج کرن جاواں گے، دھاندلی دیاں تحقیقات دا ٹاسک پارلیمانی کمیشن نوں دیواں گے، دھاندلی خلاف آواز چُکنا ساڈا حق اے، نواز شریف پرعزم نیں تے حوصلے وچ نیں۔ اوہ اج اڈیالا جیل وچ پارٹی قائد نواز شریف نال ملاقات مگروں میڈیا نال گل بات کر رہے سن۔
اوہناں نے ایس سوال کہ تُسیں کل احتجاج وچ رلت کیوں نہیں کیتی؟بارے گل بات کردے ہوئے کہنا سی کہ ایہ کوئی پہلا احتجاج نہیں اے۔ آؤندے ویلے نوں وی احتجاج ہون گے۔ اسمبلی اندر حلف چُکاں گے تے ساریاں پارٹیاں اپنا احتجاج وی ریکارڈ کروان گیاں۔ اسمبلی وچ وزیر اعظم نوں مبارکباد دین نہیں بلکہ دھاندلی خلاف احتجاج تے تحقیقات دی منگ کرن جاواں گے۔
الیکشن نوں ملک اندر تے باہر دھاندلی زدہ قرار دتا جا رہیا اے۔ شہباز شریف نے آکھیا کہ نواز شریف پرعزم نیں تے پورے حوصلے وچ نیں۔ نواز شریف بالکل انتشار دی سیاست نہیں چاہندے ۔ پر جو حق اے تے ملک اندر جو ناانصافی ہوئی اے اوہدے خلاف آواز چُکنا ساریاں جماعتاں دا حق اے۔ ایس حق لئی اسیں اپنی آواز آئینی تے قانونی طریقے نال چُکاں گے۔ اوہناں نے آکھیا کہ نواز شریف نے سانوں قانون تے آئینی راہ اختیار کرن دی گل آکھی۔
اوہناں نے آکھیا کہ ساریاں اپوزیشن جماعتاں نے پارلیمان نوں ٹاسک دیواں گے کہ اوہ ایس گل دی کھوج لان کہ الیکشن والے دن کس طرحاں آر ٹی ایس بند ہو گئی سی۔ پولنگ ایجنٹ نوں کیوں ہٹایا گیا۔ اوہناں دی غیر موجودگی وچ کیوں گنتی کروائی گئی، ووٹراں دیاں لائناں وچ سُستی کیوں ہوئی؟ایہناں ساریاں شیواں دا سچ قوم ساہمنے لیاواں گے۔ شہباز شریف نے آکھیا کہ مذاکرات دا مطلب این آر او نہیں اے۔
مذاکرات دے بغیر کدی سیاسی جماعتاں زندہ نہیں رہیاں۔ این آر او کوئی لینا چاہندا اے نہ ای دینا۔ صدر (ن) لیگ نے آکھیا کہ الیکشن توں پہلاں بدترین پری پول دھاندلی کیتی گئی۔ ساڈے اک امیدوار خلاف رات دے انھیرے وچ فیصلا سُنایا گیا۔ ایہدے مگروں قومی و صوبائی اسمبلیاں وچ وی ساڈے بُہتے امیدوار جتے نیں۔ پنجاب وچ حکومت بنان بارے اوہناں نے آکھیا کہ ایہ سبھ لوکائی ساہمنے اے۔ کیویں جہازاں وچ پیسے بھر کے لوکاں دی ویچ وٹک(خریدو فروخت)کیتی گئی۔
