لاہور( پاکستان پوائنٹ نیوز02۔اگست۔2018ء ) پاکستان تحریک انصاف دے رہنما اسد عمر نے آکھیا اے کہ اک کروڑ سرکاری نوکریاں نہیں ونڈاں گے، تعلیم و صحت دے شعبیاں وچ وی نوکریاں ہون گیاں پر بنیادی طور اُتے ایہ نجی شعبے راہیں کیتا جائے گا، سمال اینڈ میڈیم مینو فیکچرنگ یونٹس ، ٹورازم انڈسٹری، سوشل سیکٹر، انفارمیشن ٹیکنالوجی، ایجوکیشن تے ہیلتھ ایہ سارے جاب پیدا کرن والے سیکٹرز نیں۔
نجی ٹی وی دے پروگرام وچ سینئر تجزیہ کار کامران خان نے اسد عمر کولوں اک سوال کیتاکہ پی ٹی آئی دا سبھ توں وڈا وعدہ 1 کروڑ نوکریاں تے 50لکھ گھر دین دا اے، ایہ نعرہ اے یاں ایہدے پچھے کوئی پکی منصوبہ بندی اے؟جیہدے اُتے اسد عمر نے آکھیا کہ ایس ویلے سالہوار(سالانہ) 20لکھ نوجوان مارکیٹ وچ روزگار دی بھال وچ آؤندے نیں۔ساڈا آئین آکھدا اے کہ جو وی روزگار دی بھال وچ نکلے اوہنوں روزگار دتا جائے۔
مینوں خشی اے کہ اسیں الیکشن لڑیا تے پہلی ترجیح بنائی کہ نوجواناں نوں روزگار وی دینا اے۔ اسیں اوہدے اندر جو شیواں ویکھیاں تے اوہناں دا جائزہ لیا کہ کیہڑے سیکٹرز وچ سبھ توں ودھ نوکریاں پیدا کرن دی صلاحیت موجود اے۔ اوہ سمال اینڈ میڈیم مینوفیکچرنگ یونٹس نیں۔ اوہناں وچ نکے تے درمیانے مینو فیکچرنگ یونٹس، ٹور ازم انڈسٹری، سوشل سیکٹر، ایجوکیشن تے ہیلتھ ایہ سارے جاب پیدا کرن والے سیکٹرز نیں۔
ایسے طرحاں انفارمیشن ٹیکنالوجی دی پوری پالیسی اے کہ ایہدے وچ کس طرحاں جاب دینی اے۔ اوہناں نے آکھیا کہ گھراں بارے جو اسیں آکھیا ایہدے وچ ایہ اے کہ لوکاں نوں چھت چاہیدی۔ پاکستان وچ اک کروڑ لوکاں کول اپنا گھر نہیں اے۔ ہاؤسنگ دا گھٹو گھٹ 32صنعتاں اُتے اثر پیندا اے۔ جدوں اسیں وڈی پدھر اُتے گھر بناواں گے فیر اوہدے نال 32صنعتاں اُٹھن گیاں تے ملازمتاں وی پیدا ہون گیاں۔ اوہناں دا کہنا سی کہ ایہ گل واضح کر دیواں کہ انج نہیں اے عمران خان اک کروڑ سرکاری نوکریاں ونڈ رہے ہون گے۔ سرکاری محکمیاں وچ وی تعلیم و صحت دے شعبیاں وچ نوکریاں ہون گیاں پر بنیادی طور اُتے ایہ نجی شعبے راہیں کیتا جائے گا۔
