اسلام آباد( پاکستان پوائنٹ نیوز31۔جولائی۔2018ء ) پاکستان تحریک انصاف نے مرکز، پنجاب تے خیبرپختونخوا وچ حکومت بنان دا فیصلا کیتا، فیصلے مگروں پارٹی دی اعلا قیادت ارکان اسمبلی دے (اعداد و شمار) آنکڑے پورے کرن وچ لگ گئی، فواد چودھری نے پچھلے دیہاڑے اپنے اک بیان وچ دعوا کیتا سی کہ پاکستان تحریک انصاف پنجاب وچ حکومت بنان دی پوزیشن وچ آ گئی اے۔
پاکستان تحریک انصاف حکومت تے سنبھالے گی پر حکومت سنبھالدے ای سبھ توں وڈاچیلنج ملکی معیشت نوں سنبھالنا ہوئے گا۔ ملک دے خالی خزانیاں نوں ویکھ کے پاکستان تحریک انصاف دے معاشی ماہرین نے وی سر جوڑ لئے نیں۔ پارٹی وسیلیاں مطابق اینی معاشی بدحالی دی وجہ توں ایس طرحاں دے حالات وچ حکومت چلانا کسے وڈے چیلنج توں گھٹ نہیں اے۔ حکومتی معاملات چلان لئی پاکستان تحریک انصاف نوں چھیتی 10ارب ڈالر قرضے یاں امداد دی ضرورت اے۔
جو حکومت بنان مگروں سبھ توں وڈا چیلنج ہوئے گا۔ پاکستان تحریک انصاف دے معاشی ماہرین وی ایس معاملے اُتے سر جوڑ کے بہ گئے نیں تے ملک نوں معاشی بحران توں کڈھن لئی کئی آپشنز بارے غور کر رہے نیں۔ قرض لئی جے آئی ایم ایف کول جانا پیا تے آئی ایم ایف وچ پاکستان نوں قرض دین دا کوٹہ صرف 2.8ارب ڈالر اے تے قرض وصول کرن بدلے پاکستان نوں آئی ایم ایف دیاں سخت شرطاں نوں وی مننا پئے گا۔ جیہدے وچ پیسے دی ویلیو دی کمی، بجلی دی قیمت وچ وادھا تے سی پیک دے کھاتے کھولن دی منگ شامل اے۔ وسیلیاں نے دسیا کہ ایس ویلے ملک وچ ڈالر دے ذخائر 9.5ارب ڈالر رہ گئے نیں۔ تجارتی کسارا(خسارہ) 38ارب ڈالر توں ودھ گیا اے تے بجٹ کسارا 2.2ٹریلین تیکر اپڑ گیا اے جدکہ سرکلر ڈیڈ 1.1ٹریلین رُپئے توں وی ودھ گیا۔
