ڈالر ہور سستا،123رُپئے دا ہوگیا

ڈالر ہور سستا،123رُپئے دا ہوگیا

لاہور( پاکستان پوائنٹ نیوز31۔جولائی۔2018ء ) ڈالر ہور سستا ہوکے 123رُپئے دا ہوگیا۔ تفصیل مطابق الیکشن 2018مگروں ڈالر سستا ہوندا جا رہیا اے جدکہ رُپئے دی قدر وچ وادھا جا ری اے۔ میڈیا رپورٹس مطابق انٹر بنک وچ امریکی ڈالر دی قدر وچ کمی دا رجحان برقرار اے۔ ٹریڈنگ دے شروع اُتے پاکستانی کرنسی دے مقابلے وچ ڈالر دی قدر وچ دو رُپئے کمی ویکھی گئی جیہدے مگروں اک امریکی ڈالر دی قیمت فروخت 123رُپئے ہو گئی اے۔

بینکنگ وسیلیاں مطابق ملک اندر ڈالر اُتے دباء دا تسلسل جاری اے۔ اج کاروبار دے شروع وچ ڈالر 123رُپئے دی سطح اُتے ویکھیا گیا۔ جدکہ اوپن مارکیٹ وچ وی ڈالر اک رُپیہ50پیسے ہور سستا ہو گیا اے۔ اوپن مارکیٹ وچ ڈالر 122رُپئے دا ہو گیا۔ چیتے رہوے کہ پچھلے دیہاڑے انٹر بنک مارکیٹ وچ ڈالر 125رُپئے دا سی۔