الیکشن توں پہلے بھارتی میڈیا نواز شریف دا ترجمان بن گیا

عمران خان پاکستان تے جمہوریت لئی چنگا نہیں:بھارتی میڈیا دا پراپیگنڈا

الیکشن توں پہلے بھارتی میڈیا نواز شریف دا ترجمان بن گیا
عمران خان پاکستان تے جمہوریت لئی چنگا نہیں:بھارتی میڈیا دا پراپیگنڈا

لاہور( پاکستان پوائنٹ نیوز24۔جولائی۔2018ء ) الیکشن توں پہلے بھارتی میڈیا نواز شریف دا ترجمان بن گیا۔ بھارتی میڈیا نے پراپیگنڈا کرنا شروع کر دتا اے کہ عمران خان پاکستانی جمہوریت لئی نقصان دہ اے، عمران خان دا آنا بھارت لئی ٹھیک نہیں۔ تفصیل مطابق 2018دے عام انتخابات وچ ہن صرف کُجھ گھنٹے باقی نیں تے ساریاں سیاسی جماعتاں اپنے اپنے مخالفاں نوں ہران لئی تیارنیں۔

وڈے فیصلے توں پہلاں پچھلی رات ساریاں جماعتاں دی انتخابی مہم اپنے عروج اُتے اپڑ کے مُک گئی اے۔ پچھلے دیہاڑے عمران خان نے لاہور وچ اپنی انتخابی مہم ختم کیتی۔ ایس ویلے عمران خان تے اوہناں دی سیاسی جماعت اک چنگی پوزیشن وچ اے۔ایس حوالے نال وڈے سیاسی تجزیہ کاراں د اکہنا اے کہ عمران خان ایس ویلے سیاسی حوالے نال اینے طاقتور نیں کہ عین ممکن اے الیکشن وچ اوہناں دی حکومت بن جائے۔

ایس موقعے تے بھارتی میڈیا نے وی عمران خان خلاف پراپیگنڈا شروع کر دتا اے۔ بھارتی میڈیا دے وڈے ناں جیہناں وچ فنانشل ٹائمز ہندوستان ٹائمز تے دی پرنٹ شامل نیں۔ ایہناں اداریاں نے عمران خان نوں بھارت لئی نقصان دہ قرار دتا اے۔ ذکر کیتے گئے اداریاں دا کہنا اے جے عمران خان پاکستان دے وزیر اعظم بن گئے تے ایہ بھارت لئی چنگا نہیں ہوئے گا۔ کُجھ اداریاں دا ایہ وی کہنا اے کہ عمران خان پاکستان تے جمہوریت لئی بہتر آپشن نہیں نیں۔