پشاور( پاکستان پوائنٹ نیوز24۔جولائی۔2018ء ) اک ہزار کفن دی تیاری دی گل ڈپٹی کمشنر پشاور ڈاکٹر عمران حامد شیخ دے گلے پے گئی،ڈپٹی کمشنر پشاور ڈاکٹر عمران حامد شیخ دی ویڈیو وائرل، سوشل میڈیا ورتیندڑاں ولوں تنقید جاری۔تفصیل مطابق میڈیا رپورٹ وچ دسیا گیا اے کہ ڈپٹی کمشنر پشاور ڈاکٹر عمران حامد شیخ الیکشن دے موقعے اُتے کیتے گئے اقدامات دا ذکر کردے ہوئے شوخے ای ہو گئے۔
ڈپٹی کمشنر نے آکھیا کہ اللہ نہ کرے جے الیکشن والے دن کوئی وڈا دُکھانت ہو جاندا اے تے اسیں اوہدے لئی تیار آں تے اسیں اک ہزار کفن وی تیار کر وا لئے نیں۔ اوہناں دا کہنا سی کہ جے کوئی وڈی کارروائی ہو گئی تے اک ہزار کفن کم آن گے۔ ڈپٹی کمشنر پشاور ڈاکٹر عمران حامد شیخ دی پریس کانفرنس دی ویڈیو ساہمنے آن اُتے لوکاں دی وڈی گنتی نے سوشل میڈیا اُتے غصے دا وکھالا کیتا۔ کُجھ سوشل میڈیا ورتیندڑاں دا کہنا اے کہ الیکشن توں پہلاں ڈپٹی کمشنر نوں ایس طرحاں دا بیان دینا چجدا نہیں۔ کیونکہ پہلے ای ملک وچ کئی دُکھانت ہوئے نیں۔ لوکاں ولوں ڈاڈھے غصے دا وکھالا کیتے جان مگروں ڈپٹی کمشنر داوضاحتی بیان وی ساہمنے آیا اے۔اوہناں دا کہنا سی کہ میری گل سیاق و سباق توں ہٹ کے پیش کیتی گئی۔
