لاہور( پاکستان پوائنٹ نیوز21۔جولائی۔2018ء ) پنجاب بھر وچ میٹرک دے نتیجے دا اعلان کر دتا گیا اے۔ میڈیا رپورٹ مطابق پنجاب بھر وچ میٹرک دے نتیجے دا اعلان کر دتا گیا اے۔لاہور بورڈ وچ پہلیاں دو پوزیشناں لین والیاں وچوں اک یتیم تے دوجا قصائی دا پُتر اے۔ لاہور بورڈ وچ پہلی پوزیشن لین والے علی پبلک بوائز ہائی سکول، رحمان پورہ دے پڑھیار توصیف افضل نے 1091نمبر لئے۔
توصیف افضل دے والد محمد افضل نے میڈیا نال گل بات کرد ے ہوئے آکھیا کہ میں گوشت ویچنا واں، میرے پُتر نے ساری تعلیم سکالر شپ لے کے حاصل کیتی۔ اوہناں نے آکھیا کہ میرے پُتر دا پوزیشن لینا میرے لئی مان جوگ اے۔ توصیف پہلے دن توں ای بہت محنت دا عادی اے۔ بالاں دی اعلا تعلیم لئی ہر ممکن کوشش کراں گا۔ ایس توں وکھ جنوبی پنجاب دے ضلع راجن پور توں تعلق رکھن والے دوجے پڑھیار و پہلی پوزیشن لین والے پنجاب دانش سکول فار بوائز دے پڑھیار وسیم یاسین دے وڈے بھرا ندیم نے آکھیا کہ ساڈے والد دا انتقال 11سال پہلاں ہویا، اسیں 4بھیناں تے6بھراں آں، میں موٹر مکینک آں تے وسیم یاسین 5ویں کلاس توں پوزیشن ہولڈر اے۔
اوہنے آکھیا کہ کامیابی ماں دیاں دعاواں مگروں اوہدی اپنی محنت دا پھل اے۔ دانش سکول دی وجہ توں ساڈا بال ایس مقام اُتے اپڑیا۔ سکینڈ پوزیشن ہولڈر ہاشم فیصل نے آکھیا کہ میں ڈاکٹر بننا چاہنا واں ۔ سکول تے اکیڈمی وچ تیاری کیتی۔ پوزیشن لئی بھروسہ سی، والد پلموناجسٹ اے۔ دوجی پوزیشن غازی آباد لاہور دی وجیہہ اسلم نے لئی۔ تھرڈ پوزیشن ہورلڈ قصور دی پڑھیار حفصہ سلیم نے آکھیا کہ کامیابیاں وچ ماں پیو تے اُستاداں دی محنت تے دعاواں شامل نیں۔ وجیہہ اسلم نے دسیا کہ میں سافٹ ویئر انجینئر بنن دی خاہمشمند آں۔ محنت کر کے پوزیشن لینا تے اوس پوزیشن نوں برقرار رکھنا اصل کامیابی اے۔ چیتے رہوے کہ پنجاب دے سارے تعلیمی بورڈز وچ میٹرک دے نتیجے دا تناسب 77.6وچ فیصد رہیا۔
